Badje Deanu Siida lei ohcan doarjaga Sámedikkis kártet rivttiid, ohcan biehttaluvvui ja Badje Deanu Siida lea váidán mearrádusa.
Badje Deanu Siidda isit Viktor Trosten čállá váidagis ahte ohcan lea siskkobealde vuoruhemiid ja lea fágalaččat čilgejuvvon bures, nu boahtá maid ovdan Sámedikki hilgumis.
– Dakka maŋŋá go Finnmárkoláhka mearriduvvui 2006:s, de álggii min bargu čohkket giliservviid ovddeš Buolbmát gielddas vai sáhttit ovddidit gáibádusa Finnmárkokommišuvdnii. Dál leat sullii 80 proseantta giliin mearridan searvat gáibádussii, čohkket giliid lea gáibidan ollu resurssaid ja leamašan eaktodáhtolaš bargu, čállá Trosten váidagis mas dáhttu Sámedikki vuoruhit sin vai barggut eai bissehuvvo.
Garra vuoruheapmi
Sámediggi čállá biehttalanreivves ahte sii leat šaddan garrasit vuoruhit ohcamiid gaskkas, ja Badje Deanu Siidda ohcan ii ceavzán dán vuoru.
Sámediggái lea boahtán ovcci ohcama main ohcco doarjja oktiibuot lagabui njeallje miljovnna ovddas, doarjjaortnega bušeahtas lea 750 000 ruvnnu.
Sámediggi lea dál meannudeamen Badje Deanu Siida váidaga.
