Sámedikki doaibmaplánas leat 17 doaimma mat galget eastadit sámecielaheami, dál galgá dievasčoahkkin meannudit doaibmaplána.
Sámedikki dievasčoahkkin álgá maŋŋebárgga, geassemánu 14. beaivvi, ja okta máŋgga áššiin maid sámediggedievasčoahkkin galgá meannudit dán vuoru lea Sámedikki doaibmaplána sámecielaheami vuostá 2022-2025 .
Doaibmaplánas leat 17 doaimma maiguin Sámediggi galgá bargat jagi 2025 rádjái. Dán plánas leat doaimmat maid Sámedikkis áigot ieža čađahit, ja doaimmat mat gáibidit ovttasbarggu ja ahte nationála eiseválddit váldet iežaset ovddasvástádusa áššis.
– Dutkanraporttat ja guorahallamat čájehit ahte sápmelaččain lea njeallje geardde eanet riska vásihit vealaheami go majoritehtaálbmogis. Golmmas njealji nuorra sápmelaččain leat vásihan vealaheami daningo sii leat sápmelaččat, nu čuožžu doaibmaplánas.
Dá leat doaimmat maid evttohit:
1. Sámediggi áigu veahkkin ruhtadit dutkanprošeavtta das movt nuorra sápmelaččat geat gullet boazodollui leat vásihan rasismma.
2. Álggahit dutkama rasismma ja vealaheami birra sápmelaččaid vuostá
3. Vuođđoskuvllas nannet oahpahusa sámi kultuvrra, historjjá ja servodateallima birra
4. Doarjut sámi gealboguovddáža ásaheami Sámi allaskuvlii
5. Ásahit gulahallama sámecielaheamis fylkkagielddaiguin
6. Nannet gulahallama politiijain
7. Ávžžuhit Stáhtaadvokáhta iskat politiijabarggu kvalitehta sámecielaheami ektui
8. Álggahit doarjjaortnega sámecielaheami hehttemii
9. Dihtomielalažžan dahkat cealkinkultuvrra sámepolitihkkáriid gaskkas
10. Álggahit ovttasbarggu sámecielaheami vuostá buot sámi dásis
11. Lasihit gulahallama ja ovttasbarggu nationála organisašuvnnaiguin ja falástallanlihkadusain
12. Álggahit gulahallama sámecielaheami birra iešguđet ealáhusorganisašuvnnaiguin.
13. Álgaga dahkat čoahkkimiidda mediain sámecielaheami birra
14. Gáibidit nationála doaibmaplána sámecielaheami vuostá
15. Ovdánahttit áittardeaddjifunkšuvnna sámecielahanáššiide
16. Ráhkadit bagadusa das movt váidit sámecielaheami.
17. Ráhkadit neahttakurssa jođiheddjiide sámecielaheami birra
Gáldu: Sámedikki doaibmaplána sámecielaheami vuostá
