– Sámi Giellagáldu ruhtadeapmi dahká giellaovttasbarggu vejolažžan, lohká Sámi Parlamentáralaš Ráđi jođiheaddji Tiina Sanila-Aikio.
– Sámi Giellagáldu ruhtadeapmi dahká giellaovttasbarggu vejolažžan, lohká Sámi Parlamentáralaš Ráđi jođiheaddji Tiina Sanila-Aikio.
Prošeakta addá sámedikkiide golbma jagi áiggi láhčit Sámi Giellagáldui bistevaš ruhtadeami.
– Sámegielaid dilli lea ain rašši. Danin sámegiella ii sáhte leat dušše prošeakta. Dál mis lea buorre vejolašvuohta bargat garrasit politihkalaččat riikkaid eiseválddiid ja ráđđehusaid ektui, vai ásahus šaddá bistevažžan, lohká Sámi Parlamentáralaš Ráđi jođiheaddji Tiina Sanila-Aikio.
Buvttadit oahppomateriálaid iešguđetge sámegillii
Ođđa tearpmat leat sámegiela geavaheami eaktun beaivválaš hállangielas, čálalaš gielas, mediain, sosiálamediain ja visot eará giellageavahanarenain. Giellagáldu bargá vuosttažettiin terminologiijain ja normeremiin. Lulli-, julev-, davvi-, anáraš- ja nuortalašgiela giellajuhkosa galget dohkkehit ja addit ávžžuhusaid ođđa terminologiija geavaheamis.
– Go gillii riegádit ja sajáiduvvet ođđa tearpmat, de lea vejolaš čađahit maiddái eará gielladoaibmabijuid, dego ovdamearkan buvttadit oahppogirjjiid ja eará oahppomateriálaid iešguđetge sámegillii, dadjá Norgga sámedikki presideanta Aili Keskitalo.
Sajáiduhttit tearpmaid
Sámegielaid giellaráját eai čuovo riikkarájáid. Ollislaš giellapolitihkka gáibida buori ovttasbarggu riikarájáid rastá. Lulli- ja julevsámegiella hállo sihke Norggas ja Ruoŧas, davvisámegiella dasa lassin maiddái Suomas, anárašgiella hállo dušše Suomas, muhto nuortalašgiella hállo sihke Suomas ja Ruoššas, ja muhtun veardde maiddái Norggas. Giellagáldu ulbmilin lea sajáiduhttit ovdamearkan lullisámegillii dakkár tearpmaid, maid ipmirdit sihke Norggas ja Ruoŧas.
– Davviriikkalaš giellaovttasbargu lea dehálaš sámegielaid oktasaš vuođu seailluheami dáfus, vai sámegielat sáhttet geavahuvvot rastá riikkarájáid nu, ahte ráját eai hehtte sámegielagiid gaskasaš gulahallama, dadjá Ruoŧa sámedikki stivrra jođiheaddji Håkan Jonsson.
Golmma jagi prošeakta
Golmma jahkásaš prošeavtta oppalaš bušeahtta lea birrasii 25,5 miljon ruvnnu (3,1 miljon euro). Mannan vahkus čielggai ahte Suoma, Ruoŧa ja Norgga sámedikkit ožžot prošektii birrasiid 7,5 miljon Norgga ruvnnu (922.439 euro) Interreg doarjaga ja badjelaš 1,3 miljon Norgga ruvnnu (163.415 euro) stáhtalaš IR-doarjaga Norgga stáhtas. Prošeakta bistá golbma jagi ja dan jođiha Suoma sámediggi. Giellagáldu doaibmagoahtá borgemánu 3. beaivvi 2015:s rájes.
