Sámi Dáiddárráđi stipeandastivra lea meannudan 62 ohcama ja juolludan 1 110 000 norgga ruvnno nuppelohkái stipeanddaide.
Sámi Dáiddárráđi stipeandastivra lea meannudan 62 ohcama ja juolludan 1 110 000 norgga ruvnno nuppelohkái stipeanddaide.
3 jahkái bargostipeanddaid ledje ožžon juoigi Karen Anna M. Buljo, filbmadáhki Ellen-Astri Lundby ja nuorra girječálli Niillas J Holmberg.
Sámi Dáiddárráđi stipeandastivra čállá ná:
– Karen Anna áiggošii ovddidit DOVNNA, namalassii mánáidluođi. Dán máhtu birra leat jearahallan. Okta su viiddis bargguin lea ealáskahttit luođi iešguđet guovlluin oktan mánáiguin ja rávisolbmuiguin, čállet preassadieđáhusastis juoigi Karen Anna M. Buljo birra.
Stipeandda áiggis áigu Karen Anna M. Buljo čohkket luđiid luohtearkivvain ja jearahallat informánttaid miehtá Sámi. Jearahallamat duođastuvvojit filbmedettiin eanadaga, giela, suopmana ja nuohta semantihka ja muitalusaid.
Golbma dokumentára
-– Ellen-Astri áigu stipeandda atnit golmma dokumentára prošektii ja ovtta filbmii mas lea temáhtalaš čuolbma, namalassii ahte nannejitgo vai hástalitgo ovddešáigge dáhpáhusat min eallima ávkkálaš vuogi mielde dál. Filmmain galgá sámi historjá leat mánggalágan oainnus ja vuođđun lea 1800-logu loahppa dálá áigái. Sápmelaččaid soahtamuš dan vuostá ahte meroštallo eará koloniála oainnus, imigrašuvdna Davvi – Amerihkás 1880-1940 jagiin leat muhtin fáttát, čállet fas filbmadáhki Ellen-Astri Lundby birra.
Áigu čállit guokte diktagirjji
– Niillas J Holmberg áigu čállit guokte diktagirjji. Nubbi lea muitalus, mii govve sámi aktivistta ja su birrasa. Nuppis lea eanet silolaš čiekŋudeapmi olbmo eallimii. Dát girjjit galget gulahallat ja doaibmat parran, čállet preassadieđáhusastis Niillas J. Holmberg bargostipeandda birra.
Maiddái Sámi Dáiddárráđi stipeandastivra lea juolludan čuovvovaš stipeanddaid:
Mátke- lohkanstipeanda:
Dramatihkkár Kenneth Hætta – 50 000 ruvnno
Filbmadahkki Egil Pedersen – 20 000 ruvnno
Ávnnasstipeanda:
Juoigi Per Tor Turi – 50 000 ruvnno
Komponista Kristine H Nordgaren – 20 000 ruvnno
Govvadáiddár Joar Nango – 40 000 ruvnno
Álggahanstipeanda:
Duojár Meerke Thomassen Vekteli – 20 000 ruvnno
Sadjásaš stipeanda:
Govvadáiddár Liisa Helander – 64 000 ruvnno
Komponista Herborg Rundberg – 106 000 ruvnno
Girječálli Risten Sokki – 50 000 ruvnno
Stipeandastivrras leat Sámi Teáhter Searvvi ovddas Mette Brantzeg, Sšmi Komponisttaid ovddas Halvdan Nedrejord, Juoigiid Searvvi ovddas Inga Berit Sara, Sámi Dáiddačehpiid Searvvi ovddas Anne Berit Anti, Sámi Filbmabargiid Searvvi ovddas Márjá Bål Nango ja Sámi Girječálliid Searvvi ovddas Sigbjorn Skåden.
