Eai leat vel ožžon vástádusa.
– Ihttin galgá bargi oažžut vástádusa, dadjá Sámedikke direktevra Inger Marit Eira-Åhren Ávvirii.
Várrugas prinsihppa
Eira-Åhren muitala sin dieđuid mielde bargis ii galgga leat čanastat Hámmárfeastta buohcceviesu korona leavvamii.
– Ii leat, ja sus maid eai leat symptomat. Son lea leamaš seamma birrasis go ovttas geas lea symptomat. Várrugas prinsihpa vuođul lea son erremis dál, ihttin galgá oažžut dieđu lea go njommon vai ii, dadjá Eira-Åhren.
Doaibmabijut
Sámedikke bealis eai bija makkárge eará doaibmabijuid johtui.
– Eat daga dan go eai leat symptomat sus. Vuordit vástádusa vuos. Jus čájehuvvo vástádus lea positiiva de mii dieđus bidjat eará návccaid johtui, dadjá Eira-Åhren.
Sámediggi almmuhii dán vahkuloahpas ja Altaposten čálii ášši birra vuosttažin.
