Mánnodaga almmuhii Norgga gonagasviessu ahte Majestehta Gonagas Harald nammadii dáiddára, Hans Ragnar Mathisena, Gonagaslaš bassi Ovllá ortnega 1. klássa riddárin.
Sámediggepresideantta Silje Karine Muotka mielas Hans Ragnar Mathisen/ Elle Hánsa duođai ánssáša dan gudneárvomearkka ja nammaduvvot 1. luohká Riddárin, go son gierdevaččat ja áŋgirvuođain lea máŋggaid logiid jagiid čalmmustahttán sámi dáidaga viidát, sihke Sámis, Davviriikkain ja muđui máilmmis. Elle Hánsa lei maid okta sis gii fárrii Mázii 1970-logus ja lei mielde ásaheamen Máze dáiddajoavkku.
– Elle Hánsa lea leamaš dárkilis jurddašeaddji dáiddár. Son govaidis bokte muitala mat áššit leat dehálaččat sápmelaččaide. Háliidan giitit go nu áŋgirit ja vuđolaččat lea bargan sámi báikenamaiguin. Son álggii 1974:s sárgut daid vuosttaš dáiddakárttaid maidda bijai sámi báikenamaid. Son lea čohkken duháhiid mielde báikenamaid ja lea geargan ráhkadit 21 dáiddakártta, dadjá Muotka preassadieđáhusas.
Lihkkosávaldat
Bálkkašupmi addo erenoamáš buori ánsobarggus, go Elle Hánsa lea eallinagi bargan dáiddárin ja maid gozihan álgoálbmotvuoigatvuođaid.
– Sámediggi sávvá hui olu lihku Elle Hánsii. Son lea vuđolaččat ja čehpet bargan dáiddasuorggis ja lea áiggiid čađa dáidagiiddis bokte čájehan man dehálaš leat sápmelaččaid eallin, kultuvra, birgejupmi ja vuoigatvuođat, čállá sámediggepresideanta Silje Karine Muotka preassadieđáhusas.
Elle Hánsii, Hans Ragnar Mathisenii, geigejuvvo Bassi Olav árvomearka Romssas gaskavahku borgemánu 31. beaivvi.
