Sámediggi Kárášjogas lea mánnodaga cuoŋománu 27. beaivvi rájes fas rabas vissis ráddjejumiiguin, koronadilálašvuođa geažil. Muhto dábálaš ofelastimiid eai gal lágit vuos.
Sámediggi lea bidjan johtui doaibmabijuid mat galggašedje suodjalit njoammuma vuostá, muhto eai datte ge váldde vuostá stuorra galledanjoavkkuid.
Sámedikkis eai fála dál dábálaš ofelastimiid, nu go dábálaččat. Mearrádus bissehit buot ofelastimiid soahpá nationála eiseválddiid rávvagiidda, mat ain juo geassemánu 15. beaivvi rádjái dáhttot garvit stuorra olmmošálbmogiid.
– Mii bivdit Sámedikki gallededdjiid doallat unnimusat 2 mehtera gaskka, garvit ahte eanebut go 5 olbmo oktanaga čoagganit seamma sadjái, ja čuovvut dábálaš buhtistanrávvagiid, čállá Sámediggi ruovttusiiddustis.
Sihtet váldit oktavuođa resepšuvnnain
Diehtojuohkinčállosat ja desinfekšuvdnaávdnasat leat resepšuvdnaguovllus fidnemis gallededdjiide. Resepšuvdna doaimmaha buot galledanregistrerema. Lea čielgasit merkejuvvon gokko geahčči galgá čuožžut go resepšuvnnain váldá oktavuođa. Girjeráju guovlu lea giddejuvvon álbmogii.
– Jus dus leat dávdamearkkat mat geažuhit ahte dus lea čottadávda dahje dovddat buohccin, de dáhttut du min galledit eará háve, čállá Sámediggi iežaset ruovttusiiddus.