-Almmuhus-
OĐĐASATSámediggi lea váidán Nussira

Sámediggi lea váidán Nussira

Journalista

-

-

Sámedikki váidda Nussira mearrádusas lea sáddejuvvon ráđđehussii. Sii oaivvildit ahte mearrádus Ealáhus- ja guolástusdepartemeanttas rihkku máŋggaid riikkaidgaskasaš ja nationála lágaid ja konvenšuvnnaid.

Sámediggi váidá Ealáhus- ja guolástusdepartemeantta mearrádusa man dahke guovvamánu 14. b. 2019, go lea juolludan doaibmakonsešuvnna Nussir ASA:i ruvkedoibmii Nussiris ja Gumpenjunis Fálesnuori gielddas.

– Dát lea okta dain stuorámus duohtademiin min eana- ja riddoguovlluin ođđaset áiggis, mas leat suorggahahtti stuorra biras- ja servodatlaš váikkuhusat. Ráđđehus galgá diehtit ahte mii áiggo vuollánit almmá dáistaleami haga, dadjá sámediggeráđđi Silje Karine Muotka preassadieđáhusas.

 

 

Golbma váldoákka

Sámediggi čujuha váidagis golmma váldoággii.

Vuosttaš váldoáigga lea ahte departemeanta ii leat mearrádusastis bidjan mearkkašahtti deattu boazodoalu, sámi kultuvrra, ealáhusbarggu ja servodateallima vuhtii váldimii, nu go minerálalágas geatnegahttojuvvo.

Sámediggi oaivvilda ahte ruvkedoaibma rihkku vejolašvuođa doaimmahit sámi kultuvrra guovllus.

Nubbi váldoágga lea ahte departemeanta ii leat čielggadan lea go ruvkedoaibma servodatekonomalaččat gánnáhahtti, iige departemeanta leat árvvoštallan lea go mearrádus servodatekonomalaččat dohkálaš.

Departemeanta ii ge leat bidjat vuođđun luondduvalljodatlága ovdagihtii várrugas prinsihpa.

Goalmmát váldoágga lea ges ahte departemeanta addá doaibmakonsešuvnna searvái mas njealjádasoassi eaiggádiin hálddašanregistaris leat čihkosis, ja maid departemeanta, Sámediggi, vuoigatvuođaoamasteaddjit eaige álbmot muđui ge dieđe geat dat leat. Stuorradiggi lea hui kritihkalaš servviide main lea čiegus eaiggátvuohta.

 

 

– Suorggahahtti allamielalaččat

Sámediggi oaivvilda ahte dasa lassin lea čielggadusain birrasa ja guolástusa birra, oppalaš váilivuohta.

Sii čujuhit maiddái dasa ahte eai leat leamaš duohta konsultašuvnnat eiseválddiid ja guovllu boazodolliid gaskka.

– Departemeanta ii leat vuhtii váldán sámi beroštumiid, luonddu- ja birasgáhttenorganisašuvnnaid iige stáhta iežaset fágaorgánaid, mat leat dorjon Sámedikki fuolastumiid. Nu lea departemeanta suorggahahtti allamielalaš go duolbmá vuoigatvuođaoamasteddjiid go lea nu mielas riggudahttit veaháš muhtun eaiggádiid ja ruvkeinvestevrraid, maid eat oppa dieđege geat sii leat. Sámi bearrašiin rivvejuvvo birgejupmi ja riska lea ahte Riehpovuotna billistuvvo. Dát lea speallu man ovddas mii ferte máksit. Dan eat sáhte mii dohkkehit, dadjá Muotka.

 

 

Vuoruhuvvon ášši

Váidda manná dál meannudeapmái Gonagassii stáhtaráđis.

Sámediggi lea guovtti dievasčoahkkináššis stuorra eanetloguin čielgasit vuostálastán ruvkeprošeavtta Nussiris ja danne lea leamaš vuoruhuvvon ášši Sámedikkis, muitala sámediggepresideanta.

– Sámi servodat ferte leat gearggus dasa ahte Nussir ášši vejolaččat geahččaluvvo Norgga duopmostuoluin prinsihpalaš sivaid geažil, loahpaha sámediggepresideanta Aili Keskitalo preassadieđáhusas.

-Almmuhus-