-Almmuhus-
-Almmuhus-
OĐĐASATSámediggi lea nammadan lahtuid Boazodoallostivrii

Sámediggi lea nammadan lahtuid Boazodoallostivrii

Journalista

-

-

Guovtti jahkái eai leat sámediggeáirasat leamašan Boazodoallostivrras. Dál leat nammadan njealji jahkái áirasiid dohko.

Vaikke Sámedikkis leat dadjan ahte Boazodoallostivrras ii leat sámediggeáirasiin váldi.

Boazodoallostivrra njuolggadusaid mielde galget leat sámediggeáirasat álot unnitlogus stivrras, ja stáhtaáirras galgá maid álot leat jođiheaddji.

Dál leat liikká soahpan Eanandoallo- ja biebmodepartemeanttain, ahte sii nammadit iežaset golbma áirasa dohko.

– Boazodoallostivrras lea dehálaš doaibma ja meannuda ollu áššiid mat gusket boazodollui. Danne leat mii hui ilus go leat soahpan nannet boazodoallogelbbolašvuođa stivrras, lohká sámediggeráđđi Silje Karine Muotka.

– Sámediggeráđđi lea nammadeamis golbma lahtu ja várrelahtuid čuvvon evttohusaid maid earret eará Norgga Boazosápmelaččaid Riikkasearvi (NBR) lea ovddidan árabut dán áigodagas, dadjá son.

 

Eai evttohan láhkkarievdadeami

Jagi 2019 guovvamánu álggus ovddidii departemeanta láhkarievdadusa gulaskuddamii, mas lei maiddái evttohus rievdadit § 71 boazodoallostivrra nammadeami.

Das evttohii departemeanta rievdadit lága nu ahte Sámediggi ii šat galgga nammadit lahtuid stivrii, muhto ahte sáhttá.

Dát evttohus gessojuvvui, iige meannuduvvon Stuorradikkis.

 

Boazodoallostivraáirasat 2019-2023 leat:

– Inge Even Danielsen, Plassje

– Inger Marie Gaup Eira, Guovdageaidnu

– Leif Anders Somby, Kárášjohka

 

Várrelahtut leat:

– Bjørn Thomas Åhren, Namdalseid

– Inger Marit Eira Åhren, Ráureviika

– Anders Somby Jr, Kárášjohka

-Almmuhus-