Sámediggi lea juolludan 14 366 000 ruvnnu doarjaga iešguđet oahpponeavvoprošeavttaide.
Prošeavttat gullet vuoruhuvvon fágaide, numo oahpponeavvut sámegielas, davvi-, julev- ja máttasámegillii ja earenoamážit heivehuvvon oahpponeavvut. Sámediggi lea dán jagi ožžon ohcamiid 77,6 mill ruvnnu ovddas, ja dál leat vuosttaš oassi meannuduvvon. Čakčageasi mielde meannudit nuppi oasi ohcamiin.
– Lea dehálaš buvttadit oahpponeavvuid buot golmma sámegillii, go dárbu ođasmahtton ja áigeguovdilis oahpponeavvuide lea stuoris. Lean duhtavaš go vuoruhuvvojit oahpponeavvut sihke vuosttaš- ja nuppegielagiidda, dadjá sámediggeráđđi Mikkel Eskil Mikkelsen.
Erenomáš duhtavaš
Dál buvttadišgoahtit oahpponeavvuid lullisámegielfágas 1. – 4. ceahkkái, julevsámegiel nubbegiellan vuođđooahpahussii ja davvisámegiella nubbegiellan joatkkaskuvladásis.
– Dál leat earet eará vuoruhan prošeavttaid mat gárvánit vuollel guovtti jagis. Mii oaidnit ja gullat hui dávjá ahte sámi oahpaheaddjit ja váhnemat moitet go eai leat doarvái oahpponeavvut. Sámediggi lea erenoamáš duhtavaš go digitála prošeavttaid plánejit gárvet vuollel guovtti jagis, dadjá Mikkelsen.
Dehálaš dovdat makkár dárbbut leat
Sámediggi oaivvilda leat šállošahttin go dán jagi eai lean boahtán ohcamat visot vuoruhuvvon sámegielfágaide. Sii eai leat ožžon ohcamiid lullisámegillii nubbegiellan gaskadássái, ja julev- ja davvisámegillii nubbegiellan fidnofágalaš suorgái. Dan oktavuođas dieđiha Sámediggi ahte lea hui buorre go dat ohcamat mat leat boahtán, leat nu buorit ahte sis lei vejolašvuohta doarjut daid.
Sámediggi lea maid duhtavaš dainna go dán jagi lea leamašan vejolašvuohta juolludit doarjaga sámegiela ovdáneapmái ohppiide geain leat erenoamáš dárbbut skuvllas. Sidjiide lea erenoamáš dehálaš ahte oahpponeavvut leat sámegillii, ja dárbu dan fágasuorggis lea stuoris. Sámediggi lea maid juolludan doarjaga oahpponeavvoprošektii servodatfágas, dan hui áigeguovdilis fáddái; neahttageavaheapmi. Oahpponeavvu lea davvi-, julev-, ja lullisámegillii.
Sámediggi lea ráhkadeame ođđa mihtuid ja strategiijaid oahpponeavvo ráhkadeapmái, mii boahtá dálá oahpponeavvodoaibmaplána sadjái. Lea dehálaš dovdat makkár dárbbut leat skuvllain, ja árvvoštallat ođđa doaimmaid mat beaktilmahttet oahpponeavvobuvttadeami. Dat plána galgá válbmanit dán jagi loahpas.
