Sámediggi juolluda 450 000 ruvnno doarjjan Návet Doallu DA doaibmavistti stuorideapmái Deanus.
Sámediggi čállá preassadieđáhusas ahte Návet Doallu DA lea okta stuorámus oktasašnávehiin Finnmárkkus, ja rámida go áigot ovddidit doaimma.
– Eanandoallu Deanus lea deaŧalaš ealáhus gielddas, dadjá sámediggeráđđi Silje K. Muotka (NSR).
Sámediggi čállá ahte eanandoalloealáhus lea bidjan vuođu ássamii Deanus ja lea váikkuhan dasa ahte ollu fitnodagat leat ásahuvvon Detnui.
–Sihke meieriijas Deanus, Felleskjøpetis, mášenfitnodagain, ealáhushutkiin ja eará doaimmain leat boanddat deaŧalaš kundara. Go addá doarjaga dán huksemii, de nanne dat dán doalu doaibmavuođu. Go hukse ođđa roavvafuođđarsilo ja viiddida fuođđarlanja, de álkidahttá dat barggu doaibmavisttis. Dan geažil šaddá maiddái eanet optimála biebman, čállá Sámediggi.
Nuoraid rekrutteret
Sii oaivvildit dan maid bisuhit nuoraid guovllus.
– Dat go nuorat maiddái besset searvat bargui dagaha ahte ovttasdoaibma sihkkarastá nuoraid rekrutterema. Go nuorat bissot gielddas, de geasuha dat maiddái eará nuoraid bissut gielddas. Doaibmavisttiid ođasmahttin ja viiddideapmi sihkkarastá ahte nuoraid mielas šaddá geasuheaddjin áŋgiruššat dahket eanadoalu birgejupmin, dadjá Muotka.
Sámediggi lea várren lagabui 10 miljon ru 2020:s vuođđoealáhusaide. Dáinna vuoruhemiin leat Sámedikkis vejolašvuođat doarjut dán lágan huksendoaibmabijuid, dieđiha Sámediggi preassadieđáhusas.
