Sámediggi joatká sámi giellavahkkuin ja hástala buohkaid: – Searvva don maid!
– Goalmmát jagi juo áigut mii čalmmustahttit Giellavahkku. Mii háliidit ásahit árbevieru ahte ovddidit beroštumi sámi gielaide, ja lea movttiidahtti oaidnit ahte beroštupmi čalmmustahttit sámi gielaid lassána jagis jahkái, lohká sámediggepresideanta Aili Keskitalo.
Oktasaš davviriikkalaš doaimmat
Sámediggi čilge ahte giellavahkku lea oktasaš davviriikkalaš ovttasbargu masa Norgga, Ruoŧa ja Suoma sámedikkit leat vuolggahan jurdaga ahte sámi gielat čalmmustahttojit báikkálaččat, regionálalaččat ja našunálalaččat. Mihttun sámi giellavahkkuin lea čalmmustahttit sámi gielaid stuoraservodagas, lasihit dihtomielalašvuođa sámi gielaid ektui ja váikkuhit eanet giellageavaheapmái.
– Sámediggi háliida ahte sámi gielat galget oidnot ja gullot buot servodatsurggiin – leaš dál rámbuvrriin, mediain, iešguđetlágan kulturlágidemiin ja sosiála mediain, čállá Sámediggi preassadieđáhusas.
Ávžžuhit searvat
Sámediggi ávžžuha danin sihke priváhta ja almmolaš aktevrraid ja institušuvnnaid searvat čalmmustahttimii sámi giellavahkkus.
– Sámi institušuvnnat ja aktevrrat mat geavahit ja čalmmustahttet sámi giela beaivválaččat leat earenoamáš dehálaččat dán barggus, ja mii sávvat ahte nu eatnasat go vejolaš leat mielde ovddideame ja čalmmustahttime min sámegielaid sihke fysalaš lágidemiid bokte ja sosiála mediain, lohká Keskitalo.
Oza doarjaga Sámedikkis
Sámediggi ávžžuha olbmuid váldit oktavuođa giellaguovddážiiguin dahje eará servviiguin iežaset lagasbirrasis, dieđihandihte hálu searvat giellačalmmusteapmái vahkku 43:s, dahje sáhttá maid ieš evttohit doaimmaid. Organisašuvnnat ja searvvit sáhttet ohcat Sámedikkis doarjaga gielladoaimmaide Giellavahkku oktavuođas.
– Sáhttá leat nu unnánaš go ovdamearkka dihte čállit «Bures boahtin» du kafea olggobeallái, dahje oažžut osiid du neahttasiiddus jorgaluvvot sámegillii. Okta báikkálaš aviisa sáhttá dahkat ovdasiiddu sámegillii, dahje sáhttá maid lágidit giellakafea. Leat ollu vejolašvuođat sidjiide geat háliidit searvat ávvudit sámi gielaid, lohká sámediggepresideanta Aili Keskitalo.
Sámi giellavahkku lea dán jagi golggotmánu 25. – 31.beivviid.
