Bealit háliidit ain vuoruhit duodjeealáhusa gánnáhahttivuođa.
Boahte jagi rámma lea 7,1 miljovnna ruvnnu.
Dasa lassin galgat vuoruhit earret eará mearkagálvohuksema ja gealboloktema.
– Sámedikki váldomihttomearri duojis lea ovddidit duoji ealáhussan. Mii leat ovttaoaivilis joatkit doaibmadoarjjaortnega sidjiide geat doaimmahit árbevirolaš duoji, dadjá sámediggeráđđi Berit Marie Eira preassadieđáhusas.
– Árbevirolaš duodji gáibida bargonávccaid, ja dan sivas oaidnit mii dehálažžan gokčat liigegoluid go buvttadit dujiid, dadjá Eira.
Lea maiddái várrejuvvon ruhta investeren- ja ovddidandoaimmaide.
Dáinna poasttain lea earret eará vejolaš duojáriin bargat ođđadesignain.
Sáhttet juolludit alit doarjagiid
Sámediggi čállá preassadieđáhusas ahte ealáhusšiehtadus addá duojáriidda buoret ekonomalaš ortnegiid eará ealáhusaid ektui.
Sámediggi sáhttá earret eará juolludit alit doarjagiid duojáriidda geat háliidit ovdánahttit ealáhusaset.
1, 9 miljovnna ruvnno servviide
Šiehtadusas lea maiddái várrejuvvon lagabui 1,9 miljovnna ruvnnu jođihit organisašuvnnaid Sámiid duoji ja Duojáriid ealáhussearvvi .
Dát galget earret eará bargat dan ala ahte ovddidit duodjeealáhusa ekonomalaš dili. 2020:s galget bealit geahčadit ovddasvástádusa juohkima duojis ja mo duojárat galget ovdánahttit sin ealáhusa.
– Ii leamašana vejolaš lasihit
Sámediggeráđđi Eira lohká ahte Sámediggi lea ožžon garra reálanjiedjama sin beaivválaš doibmii maŋŋá go stáhtabušeahtta lea almmuhuvvon.
– Mii leat ovdal rehkenastán ahte Sámedikki bušeahtta njiedjá 12 miljovnna ruvnnuin maid Sámediggi ferte seastit. Dán sivas ii leat leamaš vejolaš lasihit šiehtadusa, dadjá sámediggeráđđi.
– Šállošahttii
Sámediggi šálloša go Duojáriid ealáhussearvi válljii botket šiehtadallamiid.
Šiehtadus lea danin dahkkon dušše Sámiid dujiin.
– Šiehtadusas lea ain ealáhusprofiila ja mii doaivut ahte duojárat oidnet ávkki das ahte ealáhusšiehtadus doarju duoji dehálaš sámi ealáhussan ja kulturguoddin, lohká Eira vel preassadieđáhusas.
