-Almmuhus-
-Almmuhus-
SMÁVVAOĐĐASATSáme­diggi ja Dearvvaš­vuođa ja bures­veadjima lágádus nannejit ovttas­barggu

Sáme­diggi ja Dearvvaš­vuođa ja bures­veadjima lágádus nannejit ovttas­barggu

-

-

Sámediggi ja Dearvvašvuođa ja buresveadjima lágádus (THL) vuolláičállet gaskavahkku 29.11.2023 ovttasbargosoahpamuša Suoma sámeálbmoga dearvvašvuođa ja buresveadjima ovddideami várás. Deaivvadeamis Anáris álggahuvvo geavada doaimmaid oktasaš válmmaštallan.

Sámedikki ja Dearvvašvuođa ja buresveadjima instituhta jođiheaddjit deaivvadit Anáris Sámekulturguovddážis Sajosis. Sámediggi ja Dearvvašvuođa ja buresveadjima instituhtta háliidit nannet sámeáššiid guoski ovttasbarggu ovttasbargosoahpamušain mii vuolláičállo deaivvadeamis. Ovttasbargosoahpamuššii gullet jahkásaš ovttasbargoráđđádallamat, main sohppojuvvo dárkilabbot jahkásaš doaimmaid birra.

– Soahpamuš lea mearkkašahtti, daningo dan vuođul huksejuvvo vuođđu, man bokte sámit leat mielde sin guoski proseassain ja daid plánemis. Lea dehálaš, ahte dieđuid buvttadeami oktavuođas sámiid kollektiivvalaš eamiálbmotvuoigatvuođat earuhuvvojit, dadjá Sámedikki ságajođiheaddji Tuomas Aslak Juuso preassadieđáhusas.

– Sámit eamiálbmogin leat dehálaš oassi Suoma máŋggalágán álbmogis. Mii háliidat Dearvvašvuođa ja buresveadjima instituhtas vuhtiiváldit sin boahttevuođa buorebut min doaimmas ja dahkat dan buori ovttasbarggus ja vuorrováikkuhusas sámiiguin ja Sámedikkiin, dadjá Dearvvašvuođa ja buresveadjima instituhta oaivehoavda Markku Tervahauta preassadieđáhusas.

Soahpamuš dihkkáda konkrehta daguid ovttasbargui. Lassin ovttasbargosoahpamuššii buktá Dearvvašvuođa ja buresveadjima instituhta doibmii mihttomeriid, maiguin lasihuvvo bargiid máhttu sámegielaid, kultuvrra ja eamiálbmogiid vuoigatvuođaid birra. Maiddái lágádusa sámegielat gulahallan ovddiduvvo. Ovttasbargu ovddida maiddái ON julggaštusa eamiálbmogiid vuoigatvuođaid birra ja eamiálbmogiid máilmmikonferánsan dovddus ON oktasaščoahkkima alla dási dievasčoahkkima loahppaáššebáhpára mihttomeriid, maiguin ovddidit sápmelaš dearvvašvuođa ja buresveadjima.

-Almmuhus-