Sámediggi ja Davvi Dearvvašvuohta RHF vuolláičálle odne ovttasbargošiehtadusa mii galgá buoridit ovttasbarggu dearvvašvuođabálvalusaid ovdánahttimis sámi álbmogii.
Sámedikki dievasčoahkkin meannuda dán vahkku ovttasbargošiehtadusa, man Davvi Dearvvašvuohta RHF stivra ja Sámediggeráđđi leat mearridan.
– Lea buorre olahus go dát ovttasbargošiehtadus sohppojuvvo. Diđolašvuohta ahte sápmelaččain leat earenomáš hástalusat dearvvašvuođa bálvalusaid ektui leat lassánan. Dát guoská earenoamážit gillii ja kultuvrii. Min mihttu lea buorebut heivehit vai šaddet ovttaárvosaš dearvvašvuođabálvalusat, cealká Davvi Dearvvašvuođa stivrajođiheaddji Marianne Telle.
Ovttasbargošiehtadus mudde dan dábálaš ovttasbarggu. Šiehtadus gusto maid Davvi Dearvvašvuođa RHF dearvvašvuođadoaimmaide dain surggiin mat gullet sápmelaččaid dearvvašvuođabálvalusaide, čállá Sámediggi preassadieđáhusastis.
Fásta deaivvadanbáikkit
Álggus juohke sámediggeáigodagas lágiduvvo oktasaš čoahkkin gaskal Sámedikki ja Davvi Dearvvasvuođa RHF, gos stáhtus ja viidáset ovddideapmi spesialistadearvvašvuođabálvalusas sámi álbmogii lea áššelisttus.
Dasa lassin galget lágiduvvot guokte jahkásaš ovttasbargočoahkkima gaskal Sámedikki ja Davvi Dearvvasvuođa RHF. Sámediggi galgá buktit mearkkašumiid daidda jahkásaš doaibmadokumeanttaide maid Davvi Dearvvasvuođa RHF ráhkada.
Oktasaš prošeavttat dearvvašvuođa birra
Davvi Dearvvasvuođa RHF ja Sámediggi leat ovttaoaivilis vuolggahit oktasaš prošeavttaid main sámi álbmoga dearvvašvuohta ja ovttaárvosašvuohta earenomášdearvvašvuođabálvalusaide biddjo áššelistui.
Sámediggi lea Davvi Dearvvasvuođa RHF ovttasbargoguoibmi mii gusto ovddidit dearvvašvuođafálaldaga sámi álbmogii.
– Eanet sámi váikkuheapmi
Sámediggeráđđi lea maid hui duhtavaš go ovttasbargošiehtadus gaskal Sámedikki ja Davvi Dearvvašvuođa hábmejuvvo.
Earenoamážit go jurddaša ahte Davvi Dearvvašvuohta lea ožžon erenoamáš ovddasvástádusa spesialistadearvvašvuođabálvalusain sámi álbmogii.
– Ovttasbargošiehtadus lasiha sámi váikkuheami spesialistadearvvašvuođabálvalusaid ovddideamis sámi álbmogii. Seammás dat maid mielddisbuktá ahte sámi divššohasaid dárbbut ja hástalusat bohtet albmosii ollu buorebut, lohká sámediggeráđđi Mikkel Eskil Mikkelsen.
