-Almmuhus-
-Almmuhus-
-Almmuhus-
OĐĐASATSámediggi ilus go OED hilgu Sandhaugen bieggafápmorusttega

Sámediggi ilus go OED hilgu Sandhaugen bieggafápmorusttega

-

-

Oljo- ja energiijadepartemeanta (OED) lea váldán vuhtii váidagiid mat leat boahtán NVE mearrádussii ahte guhkidit huksenáigemeari Sandhaugen bieggafápmorusttega dáfus Romssas.

– Dát mearkkaša ahte orohat lea doahttaluvvon áššis. Sandhaugen bieggafápmorusttet ii duohtan dahkkojuvvo ja dainna lea Sámediggi duhtavaš. Sállira orohat lea ovdalaččas šaddan gierdat olu sisabahkkemiid. Go Oljo- ja energiijadepartemeanta dál geassá konsešuvnna man NVE lei addán, de lea dat illusáhka midjiide, dadjá sámediggeráđđi Silje Karine Muotka preassadieđáhusastis.

 

Čađahan váilevaš váikkuhusárvvoštallamiid

Sámediggi lea konsultašuvnnain OED:in čuovvulan departemeantta konklušuvnna.

Sámediggi lea čujuhan dasa ahte sámi beroštumit guovllus eai leat váldojuvvon vuhtii NVE áššemeannudeamis, ja NVE mearrádusat Sandhaugen bieggafápmorusttega áššis leat hui váilevaččat daid váikkuhusárvvoštallamiid ektui maid huksen livččii mielddisbuktán Sállira boazodollui.

– Seamma guovllus leat juo huksegoahtán guokte stuora bieggafápmorusttega. Dasa lassin plánejuvvo alpiidnarusttet ja mátkeealáhusrusttet daid areálaid siskkobealde mat gullet orohaga boazoguohtunguvlui. Lagasvuohta Davvi-Norgga stuorámus gávpogii mielddisbuktá orohahkii čielga hástalusaid areálageavaheami dáfus. Sámediggi lea máŋgga oktavuođas čujuhan dasa ahte guovllu boazodoallu šaddá gillát olu. Danne oaivvilda sámediggeráđđi ahte ii leat vuođđu addit lobi jus maŋŋel boađášii ođđa konsešuvdnaohcan hukset bieggafápmorusttega Sandhaugenii, loahpaha Silje Karine Muotka.

-Almmuhus-