Sámediggi dieđiha ahte sii eai gáibit ruovttoluotta juolluduvvon doaibmadoarjaga lágidemiide maid ealáhusat eai sáhte lágidit koronavirusa njoammudávdda dihtii.
Sámediggi dieđiha doarjjavuostáiváldiide ahte sii eai gáibit ruovttoluotta doarjaga geat leat ožžon fásta doaibmadoarjaga lágidemiide maid ii leat vejolaš lágidit koronovirusa eastadeami geažil. Sámediggi dohkkeha maid ahte prošeavttat maŋiduvvojit.
– Mii eat gáibit ruovttoluotta doarjaga sis geat ožžot mis fásta doaibmadoarjaga lágidemiide maid eai sáhte čađahit koronavirusa geažil. Dasa gullet bušetterejuvvon golut ráhkkananbargui ja doaimma čađaheapmái, ovdamearkka dihte golut dolliide dahje artisttaide. Buot goluid ferte duođaštit rehketdoalus ja raporttas seamma ládje go dábálaččat, lohká sámediggepresideanta Aili Keskitalo.
Sámediggi ávžžuha lágideddjiid geain leat šiehtadusat artisttaiguin ja vuolit lágideddjiiguin geahččalit gávdnat čovdosiid mat maiddái sihkkarastit artisttaid sisaboađu, nu mo ovdamearkka dihte lágidit konsearttaid eará háve. Sámediggepresideanta ávžžuha maid ásahusaid hutkat eará vugiid mo sáhtášii doaimmahit fágalaš doaimmaid dán ođđa dilis. Sámediggi bivdá ásahusaid sáddestit sidjiide e-poastta samediggi@samediggi.no ja evttohit ođđa gaskaboddosaš beaivemeari prošeavtta gárvvisteapmái ja maiddái čuovvut sin neahttasiiddus ja Facebook-siiddus oažžun dihte ođđa dieđuid.
