Jorgalahttin dihte heajos ahtanuššama eanandoalus, mas earret eará heaittihuvvojit doalut, de háliida Sámediggi nannet dáláš váikkuhangaskaomiid eanadoallošiehtadusas.
Jorgalahttin dihte heajos ahtanuššama eanandoalus, mas earret eará heaittihuvvojit doalut, de háliida Sámediggi nannet dáláš váikkuhangaskaomiid eanadoallošiehtadusas.
– Mii oaidnit stuorra vejolašvuođaid árktalaš guovlluid buktagiin, erenoamážit go jurddašit kvalitehta ja iežas mearkagálvvu. Árktalaš buktagat leat njálgaseappot, erenoamážit ruotnasat ja lábbábiergu ja árktalaš ja sámi guovlluid eará biergu, main lea kvalitehta dáfus buorre ovdamunni, dadjá sámediggeráđđi Silje Karine Muotka preassadieđáhusas.
Hástalusat árktalaš guovlluin
Sámediggái lea deaŧalaš oažžut nana ja gilvalanvejolaš eanadoalu sámi guovlluin. Dát mearkkaša stuorát buvttadandoarjaga unnimus doaluide ja ahte ovttasdoaibmanfitnodagat bisuhuvvojit. Deaivvadettiin ealáhusain lea Sámediggi ožžon deaŧalaš árvalusaid dálkkádat ja guvllolaš hástalusaid birra mat gávdnojit árktalaš guovlluin.
– Okta ovdamearka lea dat go šibitdoavttergolut leat hui sakka divron sámi guovlluin, gos šibitdoaktáriin leat guhkes gaskkat. Danne háliidat mii fokuseret dan dán jagi eanadoallošiehtadallamiin, dadjá Muotka.
Boahtteáiggi sihkkarastin
Ovdal láve Sámediggi oažžut guokte miljon ruvnno oassin eanadoallošiehtadusas árktalaš eanadoaluin áŋgiruššamii, muhto dat loahpahuvvui ovddit áigodagas. Jos Sámediggi oččošii dáid ruđaid ruovttoluotta, de sáhtášii Sámediggi ain eanet nannet báikkálaš biebmobuvttadeami sámi guovlluin.
– Midjiide lea deaŧalaš ahte eanadoalus leat buorit rámmaeavttut sihke doibmii ja ahtanuššamii. Eanadoallu lea deaŧalaš biebmobuvttadeaddji ja árvoháhkki mii sihkkarastá ássama boaittobeale guovlluin ja sámi guovlluin. Ealli gilit dáhkidit buoremusat dan ahte sámi kultuvra ja giella ožžot sihkkaris boahtteáiggi, dadjá Muotka.
Áigot ovddidit ášši
Son ii doarjjo ráđđehusa oainnu das ahte stuorrabuvttadeamit vuoruhuvvojit ovddabeallai boaittobeale báikkiid, danne go dat guovdduštahttá eanadoallobuvttadeami Norggas.
– Hui deaŧalaš lea ahte Sámediggi oažžu dađistaga stuorát váikkuhanvejolašvuođa eanadoallopolitihkas. Sámediggeráđđi áigu ovddidit ášši cealkámuša birra eanadoallošiehtadallamiidda Sámedikki dievasčoahkkimii, dadjá Muotka.
