Sámediggi sádde dál gulaskuddamii čállosa mas bivdet oainnuid makkár rolla oahpahuslágas galgá sámi oahpahusas.
– Mii sihtat Sámedikkis gullat mo sámi servodat oaidná makkár rievdadusat berrejit boahtit sadjái vai mii sáhttit buoridit sámi oahpahusa olles riikkas. Mii diehtit ahte sámi servodagas lea buorre diehtu makkár hástalusat leat, ja ođđa árvalusas oahpahusláhkii ii oidno makkár rievdadeapmi galggašii buoridit dili, muitala sámediggeráđđi Mikkel Eskil Mikkelsen (NSR).
Son dadjá ahte dainna váldet sii Sámedikkis liigerundda nu ahte ožžot ságastallat daid buoridanvejolašvuođaid ođđa láhkaproseassas. Danne sávvá ahte nu máŋgasat go vejolaš váldet oasi gulaskuddamis.
Sámedikki gulaskuddančállosis bivdet gulaskuddanjearaldagaide vástádusaid man láhkai sámi oahpahusa sáhtášii buoredit, rekrutterema oahpahussii, man láhkai sáhtášii gielddaid hástalusaid čoavdit sámi oahpahusas ja makkár rolla oahpahuslágas galgá leat sámi oahpahusas. Sámediggi jearrá maiddái ahte galggašii go Sámedikkis leat eanet váldi sámi skuvllaid eaiggátvuođa badjelasas váldimis, čuožžu preassadieđáhusas.
Šaddá viiddis proseassa
– Mii šaddat dieđusge atnit dan konsultašuvdnavejolašvuođa, ja mus lea čoahkkin boahtte vahkku máhttoministariin gos mun áiggun ovdanbuktit iežamet vuordámuša dan prosessii ahte mii áigut geahččat mo buoridit dili sámi oahpaheamis Riikarevišuvnna raportta maŋŋel, dadjá Mikkelsen ja lohká iežas ulbmilin leat ahte sámi servodagas šaddet buoret ságastallamat.
– Dat lea viehka stuorra ja viiddis proseassa Sámedikki bealis go sii dihtet man dehálaš oahpahusláhka lea, dadjá son.
Oahpaheaddjit ja váhnemat
Dán barggus leat oahpaheaddjit, suohkanat ja váhnemat dehálaččat ja Mikkelsen aigu geavahit áiggi čoahkkinastit oahppiráđiiguin, sámi oahpaheaddjeorganisašuvnnain NetSam ja eará oassádalliiguin nu ahte šaddá viehka stuorra ja viiddis proseassa.
– Mun sávan oahpaheddjiin, sámi suohkaniin ja váhnemiin boahtit moadde cealkámuša. Sii dihtet gokko čuolmmat leat, dadjá Mikkelsen.
– Sámi servodagas fertet loktet iežamet jiena, bargat viidát ja nu máŋgasat go vejolaš nu ahte sámi jietna gullo. Mun áiggun proseassa birra ovdanbuktit máhttoministarii vai oažžu váldit oasi ja diehtá mo Sámediggi bargá vai buoridit sámi oahpahusa olles riikkas, muitala Mikkelsen.
Son dadjá ahte de lea jearaldat mo galggašii ođđa láhka bargat ahte eambbosat ožžot sámegieloahpahusa,. Mo galgá ođđa láhka sihkkarastit giellalávguma ja giellabeasi, ja mo sáhttá ođđa oahpahusláhka láhčit dili riikkaid rasttálsaš sámi oahpaheapmái.
