Suomas leat ođasmahttime ruvkelága, ja dál geahččalit sámit váikkuhit dan ođđa ruvkeláhkii. Suoma Sámedikki ságadoalli Tuomas Aslak Juuso vuordá ahte ruvkeláhka váldá vuhtii sápmelaččaid álgoálbmotrivttiid.
Suoma Sámediggi atná ruvkelága ođasmahttima oktan dán čavčča dehálamos áššiin ja Sámedikki ságadoalli Tuomas Aslak Juuso oaivvilda ahte árbevirolaš ealáhusat ja ruvkeásaheamit eai heive oktii. Son vuordá, ahte ruvkeláhka sihkkarasttášii sápmelaččaid álgoálbmotrivttiid ollislaččat.
– Sámeguovllus ovttas min árbevirolaš ealáhusain eai heive ruvkedoaimmat. Min buhtis luondu ja čázadagat dárbbašuvvojit ja dat lea nana vuolggasadji. Ruvkket eai galggaše sámi ruovttuguovlluide boahtit cealká Juuso Yle Sápmái.
Suoma bargo- ja ealáhusministeriija evttohus ođđa ruvkeláhkii lea dal gulaskuddamis. Maŋŋel gulaskuddama bargagohtet rievdadusain ja evttohus geigejuvvo Suoma ráđđehusa riikkabeivviide juovlamánus 2020. Dan čállá Yle Sápmi.
