Sámediggi doarju 121 000 ruvnnuin Sápmi Pride mii lágiduvvo dán vahkkoloahpa Guovdageainnus.
Sámediggi doarju 121 000 ruvnnuin Sápmi Pride mii lágiduvvo dán vahkkoloahpa Guovdageainnus.
Sámediggepresideanta Aili Keskitalo ja sámediggeráđđi Henrik Olsen searvaba Sápmi Pridii Guovdageainnus.
– Dieđusge doarju Sámediggi dán čalmmustahttima ja dan ahte mii searvat bonju sámiid oainnusindahkamin, dadjá sámediggepresideanta Aili Keskitalo preassadieđáhusas mii lea almmuhuvvon samediggi.no siiddus.
Ráđi bealis servet
Sámediggepresideanta oassálastá lávdedigaštallamii mii lágiduvvo ihttin diibmu 20:00 Diehtosiiddas. Sámediggeráđđi Henrik Olsen oassálastá ipmilbálvalussii sotnabeaivvi borgemánu 28. beaivvi dii. 11:00.
– Sápmi Pride lea šaddan deaŧalaš arenan bonju sámiide, čájehan dihtii iežaset identitehta ja leahkima, erenoamážit daidda sámiide geat ásset árbevirolaš sámi guovlluin, dadjá Keskitalo preassadieđáhusas.
– Buorida bonju eallima
Aili Keskitalo dadjá preassadieđáhusas ahte dát festivála lea mielde buorideamen bonju sámiid eallima.
– Festivála lea maid mielde riggudahttimin min servodaga ja dahkat min eanet gierdevažžan, dadjá Keskitalo.
Positiiva ovdáneapmi
Keskitalo dadjá ahte maŋimus jagiid leat mii vásihan positiiva ovdáneami ja eanet rabasvuođa bonju sámiid dili ektui.
– Dákkár festiválat go Guovdageainnus veahkehivčče eanet bonju sámiid čájehit iežaset soju boahtteáiggis, ja ahte jávket sámi servodagas ovdagáttut bonju sámiid ektui, dadjá Keskitalo.
Sápmi Pride lágiduvvui ge vuosttaš geardde 2014:s Gironis, ja dasto Kárášjogas 2015:s. Noereh lágida dán jagi Sápmi Pride. Noereh lea Norgga beale Sámi bellodatpolitihkalaččat sorjjasmeahttun sámi nuoraidorganisašuvdna.
