-Almmuhus-
-Almmuhus-
-Almmuhus-
SMÁVVAOĐĐASATSáme­diggi doarju sámi biebmo­ruovttu mánáid ja nuoraid

Sáme­diggi doarju sámi biebmo­ruovttu mánáid ja nuoraid

-

-

Sámediggeráđđi lea juolludan 350 000 ruvnno Norgga Biebmoruovttosearvái Finnmárkkus ráhkadahttit doaimmaid sámi biebmoruovttu mánáide ja nuoraide sihke Finnmárkkus, Romssas ja Nordlánddas.

– Lea dehálaš fuolahit ja doarjut sámi mánáid ja nuoraid geat dárbbašit doaimmaid mat gusket sin gillii ja kultuvrii. Danne doarju sámediggeráđđi prošeavtta, nu ahte biebmoruovttumánáin ja nuorain lea vejolašvuohta deaivvadit ja hukset fierpmádaga, dadjá sámediggeráđđi Runar Myrnes Balto (NSR) preassadieđáhusas. 

Sámi perspektiiva galgá vuođđun

Norgga Biebmoruovttosearvvi mihttu lea buoridit kvaliteahta buot dásiin biebmoruovttufuolahusas, maid sámi sisdoalu. Dehálaš oassi barggus lea maid doaimmahit politihkalaš beroštumi nationála, regionála ja báikkálaš eiseválddiiguin buoridan dihte biebmoruovttufuolahusa.

– Lea dehálaš fállat oktasaš deaivvademiid sámi bearrašiidda gos oktasaš sámi perspektiiva lea vuođđun. Seammás lea min oktasaš ovddasvástádus sihkkarastit mánáide ja nuoraide buriid ja oadjebas sámi biebmoruovttuid, lohká Myrnes Balto.

Čoagganeamit

Guhtta čoagganeami leat plánejuvvon, golbma čoagganeami láhččojuvvojit nuoraide ja golbma leat nu gohčoduvvon bearaščoagganeamit. Čoagganemiid galgá juohkit golmma fylkii, Nordlánda, Romsa ja Finnmárku.

Preassadieđus boahtá ovdan ahte juolludeapmi lea dearvvašvuođa, fuolahus- ja mánáidsuodjalanbálvalusprošeavttaid bokte addon.

-Almmuhus-