Sámediggi lea juolludan 440 000 kruvdnosaš doarjaga Kate Johanne Utsii prošektii «Herding & Birding» Unjárgga gielddas.
Sámediggepresideanta Silje Karine Muotka (NSR) lea hui duhtavaš go Sámediggi dainna doarjagiin lea mielde nannemin lotnolasdoaimma Unjárggas.
– Konseapta lea vuođđuduvvon ovttastahttit boazodoalu ja mátkeealáhusa. Dainna lágiin lea dát fálaldat sihke miellagiddevaš ja gelddolaš turisttaide go ovttastahttá vásáhusaid mat leat čadnon boazodollui, lohká sámediggepresideanta Silje Karine Muotka.
Ii gávdno ovdalis
Kate Johanne Utsi lea boazodoalli gii dáhttu álggahit mátkeealáhusa lassiealáhussan. Fitnodaga sajádat Várjjagis dahká ahte fálaldat lea geasuheaddji kundariidda geat ohcet vásáhusaid gelddolaš birrasiin.
– Sullasaš konseapta ii gávdno ovdalis, danin lea hui gelddolaš go Utsi lea hutkan ođđa fálaldaga, lohká Muotka.
Vuoruhan doaimmat Sámedikkis
Doarjja lea addon doarjjaortnegis máŋggabealálaš ealáhusaid ja vuoruhemiid vuođul. Dán jagi vuoruhuvvojit earret eará doaimmat mat mearkkašahtti vuogi mielde leat ođasmahtti ja fitnodatovdánahtti ja doaimmat mat nannejit ealáhusaid vejolašvuođaid stuorrut ja alla barggolašvuođaovdáneami nu ahte olmmošlohku/sisafárren lassána.
