-Almmuhus-
-Almmuhus-
-Almmuhus-
OĐĐASATSáme­diggi doarju juvlastuollo­stealli gárdde lusa

Sáme­diggi doarju juvlastuollo­stealli gárdde lusa

-

-

Sámediggi lea juolludan 122 000 ruvnno doarjjan dagahit gárdái juvlastuollostealli ja dát galgá huksejuvvot Lákkonjárgga orohahkii, Guovdageainnu suohkanis.

Lákkonjárgga boazoeaiggát John Inge Eira lea ohcan doarjaga hukset juvlastuollostealli mii lea heivehuvvon lámis olbmuide ja dát stealli huksejuvvo boazogárdái. Lákkonjárgga orohat lea ohcan doarjaga dása dan dihte vai buohkat siiddas sáhttet oassálastit boazobargguin.

– Sámediggeráđđái lea dehálaš váikkuhit dasa ahte olbmot geain leat erenoamáš dárbbut ja geat čohkkájit juvlastuolus maid ožžot vejolašvuođa oassálastit boazobargguin gárdde luhtte. Dan dihte lea midjiide dehálaš beassat doarjut juvlastuollostealli ráhkadeami, mii álkida geavaheddjiid bargodili. Mii háliidit ahte buohkat geat leat bajásšaddan boazodoalus galget beassat čuovvut bargguid, lohká sámediggeráđđi Runar Myrnes Balto (NSR).

Heiveheapmi 

Sámediggi deattuha ahte beassat leat gárdde luhtte ja oaidnit iežas bohccuid, bearráigeahččat daid ja gozihit bargguid mearkkaša olu ealáhusa gullevašvuhtii.

– Mis lea jáhkku ahte heiveheapmi veahkeha dasa ahte olmmoš ii šatta nu álkit olggobeallái, ja ahte dat lea buorre olbmo psyhkalaš dearvvašvuhtii. Sávvat ahte dát stealli livččii ávkin olu olbmuide olu jagiid ovddasguvlui, loahpaha Myrnes Balto. 122 000 ruvdnosaš doarjja juolluduvvo doarjjaortnegis «Doarjja dearvvašvuođa-, fuolahus- ja mánáidsuodjalusprošeavttaide».

-Almmuhus-