Sámediggeráđđi lea juolludan 400 000 ruvnno doarjjan Hábmera suohkanii containerhápmana huksema álgobargui Ájluovttas.
Prošeavtta váldomihttu lea láhčit dili containerjohtolahkii Ájluovtta industriijakáijas. Dat galgá dahkkot dakko bokte ahte deavdit areála mearas.
– Sámediggái lea dehálaš doarjut doaimmaid mat leat mielde ovddideame ealáhusdoaimmaid suohkanis. Danne lean ilus go sáhttit doarjut dan prošeavtta, dadjá sámediggeráđđi Silje Karine Muotka (NSR)
Ájluokta guovddášsadjin
Dálá containerjohtolaga sirdin Ájluovtta káijai addá, lassin positiiva birasváikkuhusaide ja buoret johtolatsihkarvuhtii, buriid čuozahusaid ealáhusdoaimmaide Hábmera suohkanis. Containerhápmana huksen dagaha Ájluktii regionála guovddášsaji containerjohtolahkii ja nu sáhttá maŋŋel ásahit stuorát industriijaguovllu hápmana oktavuođas. Containerhápmana huksen sáhttá nu mielddisbuktit ođđaásahemiid ja stuorát ealáhusprošeavttaid ovddideami regiovnnas.
– Prošeakta addá vejolašvuođaid ásahit ođđa bargosajiid ja ovddidit Julevsámi servodaga. Mii dárbbašit eanet bargosajiid maiddái Hábmeris. Dat lea Sámedikki ja Hábmera suohkana oktasaš mihttu, dadjá sámediggeráđđi Mikkel Eskil Mikkelsen (NSR).
Doarjja addo ortnegis doarjja regionálaovddidanprošeavttaide, ja okta vuoruhemiin dán ortnegis lea prošeavttat mat ovddidit sámi giela, kultuvrra ja servodateallima fylkkagielddain maiguin Sámedikkis lea ovttasbargošiehtadus.
