Sámediggeráđi ja boazodoalloláhkalávdegoddi deaivvadii ikte eanandoalloministariin.
Boazodoalloláhkalávdegotti boazodoalloláhkaárvalus lea leamaš gulaskuddamis, dál lea áigemearri dievvan ja birrasii 43 cealkámuša leat ovddiduvvon Sámediggái. Ikte, maŋŋebárgga, deaivvadeigga sámediggeráđđi Hans Ole Eira (Gb) ja politihkalaš ráđđeaddi John Mathis Utsi eanandoallo- ja biebmoministariin Sandra Borchain (Gb). Čoahkkima fáddá lei boazodoalloláhkaárvalus, Hans Ole Eira deattuhii man dehálaš lea ahte departemeanta álggaha láhkaproposišuvnna barggu.
– Ná čuovvulat sihke Hurdalsplattforpma ja Beaiveálggu-julggaštusa, ja seammás maid čuovvut Alimusrievtti čuoggáid manne lea dárbu láhkarievdadeapmái, dadjá Hans Ole Eira. Dan čállá Sámediggi Facebookas. Čoahkkimis ledje maid mielde boazodoalli Ellen-Sara Sparrok, advokáhtta ja boazodoalli Nils Mikkelsen Utsi, láhkalávdegotti jođiheaddji, professor Øyvind Ravna, ja professor Mattias Åhren.
