-Almmuhus-
OĐĐASATSámediggi dáhttu geasehit bohccuid guorbmebiillaiguin

Sámediggi dáhttu geasehit bohccuid guorbmebiillaiguin

-

-

Sámediggi juolluda 750 000 ruvnnu fievrredit bohccuid giđđa- ja geasseorohagaide.

Sámediggeráđđi čoahkkinasttii ikte ja mearridii  juolludit 750 000 ruvnnu doarjjan fievrredit bohccuid sihke guottet-, giđđa- ja geasseorohagaide. Ollu orohagat ja siiddat fertejit johttát ealuiguin guottetbáikkiide ja geasseorohagaide heajos guohtumiid dihte.  Sámediggi oaidná ahte dálá dilis lea buoremus fievrredit bohccuid guorbmebiillaiguin, go guhkes árbevirolaš johtimat čuhcet bohccuide.

Lássejuvvon guohtumat

– Heajos dahje lássejuvvon ealát lea duođaštuvvon sihke Finnmárkkus, Romssas ja Nordlánddas. Ollu siiddain lea leamaš goavvi skápma rájes.  Dát dilli lea čuohcan sakka ealáhussii.  Ollu badjeolbmot leat máŋggaid mánuid geasehan fuođđariid siiddaide ja guođohan birra jándora, dadjá sámediggepresideanta Silje Karine Muotka (NSR).

Loga maid:
Lassi doarjja eanandollui 

– Liigebarggut deddet

Sámediggi oaidná dehálažžan ruđalaččat doarjus boazogeasehanortnega.

–  Boazodoallu vásiha vuot goavvejagi dušše guokte jagi maŋŋil ovddit goavvejagi.  Dát lea čuohcan sihke olbmuide ja elliide ja badjeolbmot leat máŋggaid mánuid eallán váttis dilis.  Sis leat leamašan liigebarggut ja ollu eahpesihkkarvuohta.  Sámediggái lea dehálaš doarjut boazogeasehanortnega, dadjá Muotka.

Lea Norgga Boazosápmelaččaid Riikasearvi mii lea ohcan dán doarjaga ja Sámediggi juolludii 750 000 ruvnnu dása.

-Almmuhus-