Dieđiha Sámediggi ruovttusiiiddu bokte.
– Sámediggi diehtá man stuorra deaddu orohagain lea, earenoamážit go jurddaša daid oallut bieggafápmoprošeavttaid maid NČE dál árvvoštallá. Vai mii buoremus lági mielde galgat sáhttit doarjut guoskevaš orohagaid, de mii oaidnit dárbbu koordineret orohagaid galledemiid.
Sámediggepresideanta Silje Karine Muotka (NSR) lea aiddo fitnan geahčadeame Skuohtanjárgga siiddas, gullan ja oaidnin dihte movt plánejuvvon bieggafápmorusttegat čuhcet sidjiide.
– Mii diehtit ahte ollu vuoigatvuođalaččat leat stuora deattu vuolde, daddjo bovdehusas.
Sámediggi bovde orohagaid/siiddaid maidda areálasisabahkkemat čuhcet dahje váldit oktavuođa Sámedikkiin jus orohagat/siiddat háliidit deaivvadit dahje ahte dat galgá vuolgit mielde geahčadeapmái.
– Lea maid vejolaš bivdit Sámedikki leat observatevran konsultašuvnnain. Danne mii bovdet guoskevaš orohagaid ovttasbargui, vai mii ovttas sáhttit sihkkarastit ahte orohagaid beroštumit vuhtii váldojuvvojit buoremus lági mielde.
Sámedikki politihkalaš ráđđeaddi Nils Ante Eira lea dan oktavuođas gulahallanolmmoš.
