Eai loga ávkki sirdit gumppe eará guvlui.
Norgga Sámediggi lea juovlamánu 12. beaivvi sádden e-poastta Dálkkádat- ja birasdepartementii mas čállet ahte Sámedikki vuordámuš lea ahte gumpe, mii lea Svahken Sijte orohagas, goddo. Svahken Sijte orohat lea guovllus gos gumpe ii galgga leat, ja Sámediggi čállá ahte sii lea duđavaččat go orohat lea váldon duođas dán áššis.
– Sámediggi ii loga čoavddusin sirdit gumppe eará guovlluide, go gumpe fas ohcala guvlui ja lea de ain stuorra áittan boazoealáhussii, čállá Sámediggi reivves. Sámediggi čujuha maid ahte Sijte orohagas leat gávdnon ráppit maŋŋá go gumpe lei guovllus. Sámediggi čujuha maiddái reivves ahte sii leat váldán oktavuođa departemeanttain skábmamánu 11. beaivvi ja muitalan dan duođalaš dili birra go gumpe lea orohaga guohtunguovllus.
Loga ášši: Gumpe máhccan boazodoalloguvlui
