Sámediggi čállá preassadieđáhusas ahte dán geasi eai fála dábálaš viessočájeheami koronadili geažil.
Sámediggi mearridii heaittihit buot dábálaš viessočájehemiid Sámedikkis korona dihte. Dál sii áigot fállat digitála viessočajeheami Sámedikki neahttasiiddus ja Sámedikki sosiála medias geassemánu rájes.
– Ollugat galledit Sámedikki jahkásaččat ja geassit lávejit leat eanemus guossit. Mii áddet go ollugat sáhttet beahttašuvvat go eai beasa galledit min dán geasi, muhto doaivut olbmuid áddet ahte koronadili geažil lea váttis midjiide váldit vuostá gussiid, mii lea dahkkojuvvon ollislaš árvvoštallama vuođul, dadjá dievasčoahkkinjođiheaddji Tom Sottinen (Bb) preassadieđáhusas.
Sámediggi bisuha gáržžidemiid gussiid ja viessočájeheami ektui geasi lohppii. Dilli árvvoštallojuvvo fas čakčat.
