Plánejuvvon ásodatvisti Kárášjohkii, mii lei jurddašuvvon Sámedikki ollesáigepolitihkkáriidda ja politihkalaš ráđđeaddiide, bissehuvvo sivas go huksengolut leat lassánan.
2020:s bivddii Sámediggi Statsbygga bidjat johtui ovdaprošeavtta geahčadit vejolašvuođa hukset ásodagaid. Čielggadeami mandáhtta lei hábmet mearrádusvuođu mas iešguđet molssaeavttut Sámedikki boahtteáiggi ásodatvistái árvvoštallojuvvojit heivvolažžan prošeaktaluvvejeaddji ja golomeroštallama vuođul.
– Gollomeroštallan prošeavtta čađaheapmái árvvoštallojuvvo leat beare allat. Hatti mii buohtastahttit sullasaš láigoásodagaid ja láigoviesuid haddedásiin Kárášjogas, gos dál láigohit ollesáiggepolitihkkáriidda, lohká sámediggeráđđi Runar Myrnes Balto (NSR) preassadieđáhusas.
Beare divrras
Ukraina dilli lea mihá muddui sivalaš haddegoargŋumii huksenávdnasiin. Gollomeroštallamat nuppi dán guovtti molssaeavttu huksemii leat 48,9 miljovnna ruvnno ja 60,5 miljovnna ruvnno.
– Dát gártá min mielas beare divrrasin. Mii bissehit plánejuvvon huksema, ja maŋidit barggu doaisttážii, lohká Myrnes Balto.
