Dáid čuovvovaš vahkkuid galgá Sámediggi meannudit guovlluođastusa, ja movt dat váikkuha sámi beroštumiide. NSR áirras Áilen Nigá Máhtte dieđiha dál juo ahte son moaitá Romssa ja Finnmárkku plánejuvvon bággoovttastahttima.
– Álbmotjienasteapmi guovlluođastusa birra čájehii čielgasit ahte finnmárkulaččat, maiddái sápmelaččat, vuosttaldit garrasit dán ovttastahttima. Buot gielddain, gos dollojuvvui álbmotjienasteapmi, lei stuora eanetlohku ovttastahttima vuostá, ja dán berrešii Sámedikki dievasčoahkkin váldit vuhtii, dadjá Áilen Nigá Máhtte NSR sámediggejoavkkus preassadieđáhusas.
– Bággen ii leat buorre čoavddus
Son vuorjašuvvá maiddái dainna movt guovlluođastus sáhttá sirdit fámu ja bálvalusaid eret Finnmárkkus.
– Mun balan ahte ovttastahttin dagaha sentraliserema, ja mun in jáhke ahte fámu ja bálvalusaid sirdin Romsii lea buorrin sámi giliide ja báikkálaš servodagaide Finnmárkkus, joatká Máhtte.
– Bággen ii leat buorre čoavddus, ja mu mielas leat Erna Solberg, Monica Mæland ja earát ráđđehusas badjelgeahččalasat go áigot hilgut álbmotjienasteami. Sámediggi berrešii doarjut dan garra vuostehágu ja Finnmárku maid álbmot dáhttu dán áššis, loahpaha Áilen Nigá Máhtte preassadieđáhusas.