Sámediggi nanne vuođđoealáhusaid áŋgiruššama 4,2 millijovnna ruvnnuin.
– Mii leat lasihan bušeahta 7,5 miljon ruvnnus 11,7 miljon ruvdnui. Mii leat maiddái lasihan stuorámus doarjaga 300 000 ruvnnus 500 000 ruvdnui háhkamiidda ja prošeavttaide, dadjá duhtavaš sámediggeráđđi Silje Karine Muotka preassadieđáhusastis.
Sihkkarastit buoret finansaeavttuid
Sihke eanadoallu, boazodoallu ja guolástus leat deaŧalaččat ássamii ja sámegielaide sámi guovlluin.
– Dán mii dahkat sihkkarastin dihtii buoret finánsaeavttuid dáid sámi ealáhusaide. Nubbi bealli lea dat go lea dárbu loktet vai sáhttá čuovvut gollolassáneami servodagas. Mii oaidnit ahte golut lassánit jagis jahkái, muhto ii dienas, dadjá Silje Karine Muotka.
Árvvoštallet viiddidit vuođđoealáhusaid vuoruhemiid
– Mii áigut geassemánus árvvoštallat ahte galggašeimmet go viiddidit vuođđoealáhusaid vuoruhemiid reviderejuvvon bušeahtas, dadjá son.
Eanadoalus bisuha Sámediggi doarjaga huksemii daid doaluide mat leat doaimmas, ja dat mearkkaša dan ahte Sámediggi sáhttá addit doarjaga divodemiide ja laktavistái.
Mariidna ealáhusain bisuha Sámediggi seamma áŋgiruššama árbevirolaš bivddus ja guollevuostáiváldinrusttegiid ektui.
– Muhto mii oaidnit ahte bohtet eará miellagiddevaš šlájat go guolli, nugo debbot. Dás lea stuorra márkanvejolašvuohta min vuotnaguovlluin, dadjá Muotka.
Eambbo ruhta boazodoallolávdegoddái
Maiddái boazodoallolávdegoddái lea lasáhus 0,5 miljon ruvnnus 1,8 miljon ruvdnui.
– Dát bargu lea deaŧalaš boazodoallopolitihkkii boahtteáigái, dadjá Muotka.
