Sámediggeráđđi lea ráhkadišgoahtán čilgehusa sámi geavaheami birra. Dan oktavuođas leat dál galledeamen suodjalanguovlluid, ja vuosttaš galledeapmi lea Sievjju álbmotmeahcci.
Sámediggeráđđi háliida oahpásmuvvat buorebut iešguđetge gáhttenguovlluiguin ja gullat mo dan hálddašit álbmotmeahccehálddašeaddjit ja álbmotmeahccestivra.
– Suodjalanpolitihkka lea leamaš doaimmas dál 90-logu álggus gitta dálážii. Dalle go álggahedje suodjalanpolitihka ja stáhta mearridii ahte galgá suodjalit daid guovlluid, de várra Sámediggi ii dorjon dan jurdaga menddo olu, muitala sámediggeráđđelahttu Silje Karine Muotka.
Son dadjá ahte Sámediggi lei aŋkke nammadan stivraáirasiid dohko. Son dadjá ahte jos galgá bealuštit ja bearráigeahččat sámi beroštumiid guovllu siskkobealde, de lea hui dehálaš ahte suodjalanáigumuš lea váldán mielde sámi áigumušaid ja ahte lea heivehan dan sámi árgabeaivvi ja dárbbuid mielde.
Čilgehus boahtte giđa
– Jos nu sáhttá dadjat dáppe Sievjjus, de lea leamašan beakkán huksenášši mas lea leamašan olu digaštallan Ságat aviissas. Dáppe lea leamašan Finnmárkkukommišuvdna doaimmas ja ášši lea leamaš Alimusrievttis. Mis leat sihke mearra- ja boazosámegeavaheaddjit nu ahte lea hui miellagiddevaš guovlu iešalddis, dadjá Muotka.
Son lohká presideantta lohpidan ahte sii galget ráhkadit sámediggečilgehusa mii galgá almmuhuvvot boahtte giđa. Čilgehusas galgá dakkár vejolaš bálggis ovddasguvlui mo mii galgat dustet politihkalaš hástalusa das.
– Nu ahte presideanta lea lohpidan ahte mis boahtá čilgehus ja mii leat álggahan dan barggu, ja dan sivas mii dárbbašat vásihit ja oaidnit feara maid. Jos leat hástalusat ja váttes áššit, de lea mu mielas hui dehálaš ahte mii galledat dakkár guovlluid gos gávdnojit dakkárlágan hástalusat, go dat addá dieđuid gos hástalusat leat árgabeaivvis, muitala Muotka.
– Mun árvidan ahte go leat galledan buot guovlluid ja vásihan buot hástalusaid, de jáhkán mis leat hui olu jurdagat maid mii sáhttit buktit čilgehussii, mii galgá čalmmustahttit hástalusaid ja mo mii sáhttit bargat vai čoavdit hástalusaid ovddasguvlui, dadjá son.
– Fertet ráhkadit sámi politihka
– Hui miellagiddevaš gal lea. Mun oainnán ahte leat hástalusat ja mii fertet ráhkadit sámi politihka vai sihkkarastit ahte sámi geavaheddjiide ja riekteguddiide lea vejolaš ásahit boahtteáiggi dain suodjalanguovlluin maiddái, dadjá Muotka.
Preassadieđáhusas čállá ahte sávvá ahte galledeapmi addá geahčestaga iešguđetge diliide álbmotmeahcis ja mo dán vásihit báikkálaš olbmot ja álbmotmeahccehálddašeaddjit. Dat lea veahkkin sin barggus čilgehusain mii boahtá Sámedikki plenumii boahtte jagi.
