-Almmuhus-
OĐĐASATSámediggeráđđi rávve hilgut Deanučázádaga luossašiehtadusa

Sámediggeráđđi rávve hilgut Deanučázádaga luossašiehtadusa

-

-

– Dán šiehtadusas ii leat doarvái doarjja ii ge adnojuvvo doarvái lobálažžan báikkálaččat, dadjá sámediggeráđđi Silje Karine Muotka gii bidjá ovdan evttohusa Sámedikki dievasčoahkkimii hilgut soahpamuševttohusa man leat šiehtadan Norga ja Suopma Deanučázádaga bivddu birra.

Sámediggeráđi oaidnu lea ahte guoskevaš vuoigatvuođalaččat galget oažžut vejolašvuođa hábmet evttohusa mas sin mielváikkuheapmi hálddašeapmái ja muddemiidda fuolahuvvo buorebut.

– Buohkat leat ovttamielalaččat das ahte bivddu ferte geahpedit gaskaboddasaččat nannen dihtii bivddu vuođu buorebut boahtteáigái, muhto dat ferte dahkkojuvvot govttolaččat sihkkarastin dihtii árbevirolaš bivddu. Viidáseappot lea Sámediggeráđi oainnu mielde deaŧalaš ahte báikkálaš olbmot, geat ásset lahka resurssa, galget vuoruhuvvot nu bures go vejolaš bivddu geahpedeami oktavuođas, dadjá Muotka.

 

– Ledje dahkukonsultašuvnnat

Sámediggi lea čađahan konsultašuvnnaid departemeanttain dán áššis, muhto ráđđelahtu Muotka mielas departemeanta lea juo ovttabeallásaččat mearridan doarjut šiehtadusa dálá hámis.

– Mu oainnu mielde dát ledje dahkukonsultašuvnnat. Konsultašuvnnain Sámediggi bijai ovdan konstruktiiva evttohusaid das mo sáhtášii sihkkarastit báikkálaš doarjaga ja dárbbašlaš lobálašvuođa šiehtadussii. Dađi bahábut ii beroštan stáhtačálli Lunde oppanassiige árvvoštallat Sámedikki evttohusa. Dat čájeha ahte gulahallanávžžuhus buriid ja ovttamielalaš čovdosiid birra mat leat konsultašuvdnašiehtadusas, čuovvoluvvojit váilevaččat departemeantta politihkalaš njunušgotti bealis, dadjá Muotka.

– Go mii dál bidjat ovdan evttohusa Sámedikki dievasčoahkkimii ahte hilgut soahpamuševttohusa, de lea min árvvoštallan ahte dievasčoahkkima nana evttohus lea nanus Stuorradikki árvvoštallama ektui dán soahpamuševttohussii. Sámediggeráđđi áigu maid čađahit čoahkkimiid Suoma bealde Sámedikkiin ja Norgga ja Suoma bealde vuoigatvuođalaččaiguin dán áššis, loahpaha sámediggeráđđi Silje Karine Muotka.

-Almmuhus-