-Almmuhus-
OĐĐASATSámedigge­ráđđi nanne sámi mánáid­gárddiid, museaid ja ealáhusaid

Sámedigge­ráđđi nanne sámi mánáid­gárddiid, museaid ja ealáhusaid

-

-

Sámediggeráđđi lea reviderejuvvon bušeahtas árvalan juohkit 9,8 miljon ruvnnu doaimmaide mat nannejit sámi servodaga. 

Stuorámus oassi dáin ruđain mannet mánáidgárddiide, museaide ja árbevirolaš sámi ealáhusaide.Sámediggi árvala 1,8 miljon ruvnnu sámi mánáidgárdde bálkkáide ja 750.000 ruvnnu fas mánáidgárddiid gelbbolašvuođa loktemii .

– Lean duhtavaš go beasan čájehit vuoruhemiid maid dahkat sámi mánáidgárddiid ektui, ja dát liigedoarjja nanne sámi mánáidgárddiid ovdánahttima ja sámi mánáid mánáidgárdefálaldagaid, lohká sámediggeráđđi Runar Myrnes Balto (NSR) preassadieđáhusas. 

Museaide eambbo ruhta

Museasuorggis, de vuoruhuvvo 1 miljon ruvdnu Davviálbmogiid guovddážii mat barget ođđa čájáhusain máhcahuvvon dávviriin, 300 000 ruvnnu árvaluvvo Savio-museai Mátta-Várjjagis ja 700 000 ruvnnu ges RiddoDuottarMuseaid hálddašit dáiddačoakkáldaga mii stuorru dađistaga ja áimmahuššat dáiddačoakkáldaga mii boahtteáiggis galgá sámi dáiddamuseas. Muđui árvala ráđđi 500 000 ruvnnu Saemien Sijte almmolaš rahpamii geassemánus.

– Museasuorggis leat ollu dárbbut ja mii árvalat njealje konkrehta doaimmaid dán vuoro, ovdamearkka dihte museadávvirat mat máhcahuvvojit ruovttoluotta Davviálbmogiid guovddážii Bååstede prošeavtta olis, dadjá Myrnes Balto.

Árbevirolaš ealáhusat

Sámediggi maid áigu geavahit 300 000 ruvnnu árvvoštallat vuotnaguolástanlávdegotti barggu ja nannet mearrasápmelaččaid guolástanvuoigatvuođaid. 250 000 ruvnnu árvaluvvo ges geahččalanprošektii meahccevuodjimis, 350 000 ruvnnu fas raporttas mas árvvoštallet mo suodjaluvvonguovllut doibmet. Lassin velá árvala sámediggeráđđi 800 000 ruvnnu čohkket dieđuid boazodoalu goavvejagiid vásáhusain.

– Beaiveálgu-soahpamušas de vuoruhuvvo addit sápmelaččaide vejolašvuođaid bargat árbevirolaš ealáhusaiguin ja dát oidno bures reviderejuvvon bušeahtas, lohká sámediggeráđđi Myrnes Balto.

Sámediggeráđđi čállá ahte reviderejuvvon bušeahtas leat maid máŋga ovttaskasdoarjaga ja sámediggeráđđi álggaha maid doaimmaid mat nannejit sápmelaččaid sajádaga.

-Almmuhus-