Sámediggeráđđi lea juolludan oktiibuot 403 000 ruvdnasaš doarjaga Hans-Magne Hansenii cegget ođđa náveha ja Aursfjord Båthavn og Kystkultursenter AS:i hukset guossehápmansajiid.
Hans-Magne Hansen buvttada mielkki ja bierggu Laksvatnis Báhccavuona suohkanis. Sutnje lea juolluduvvon 240 000 ruvnno cegget ođđa náveha. Su dálá návet lea boaris ja lea dárbu hukset ođđasa jus son galgá sáhttit joatkit oapmedáluin.
Aursfjord Båthavn og kystkultursenter AS:i lea juolluduvvon 163 000 ruvnno hukset guossehápmansajiid. Mihttu huksemiin lea buoret heiveheapmi mátkeealáhussii ja lasihit turismma dan oasis Málatvuonas.
