-Almmuhus-
-Almmuhus-
OĐĐASAT Sáme­digge­ráđđi áŋgiruššá ain rájá­rastá giella­bargguin

Sáme­digge­ráđđi áŋgiruššá ain rájá­rastá giella­bargguin

-

-

Sámediggeráđđi lea juolludan 255 000 ruvdnosaš doarjaga prošektii Deanuleagis sámástit.

Preassadieđáhusas čállá Sámediggi ahte prošeavtta ulbmil lea ásahit fierpmádaga Deanuleagi gielddaguovddážiid gaska, buoridan dihtii sámegiela geavaheami iešguđet giellaarenaid bokte. 

– Mun oainnán ahte prošeavttas áigot geavahit innovatiivvalaš čovdosiid giellabarggus man oktavuođas gaskavuođaid nannen rájá rastá ássiid gaskka Deanuleagis lea fokusis. Dát dávista sámediggeráđi politihkalaš mihttomeriide ja doalaha ahte rájit eai galgga hehttet ovdáneami, dadjá sámediggeráđđi Mikkel Eskil Mikkelsen (NSR).

Deanuleagi sámiin leat guhkes árbevierut go guoská oktasaš gillii ja kultuvrii, ja duddjomii ja gos luohti ain eallá. Danne lea rájá rastá ovttasbargu lunddolaš. Sámediggeráđđái lea deaŧalaš doarjut giellaprošeavttaid mat leat mielde sihkkarastimin rájárasttideaddji giellaovttasbarggu.

Mánát ja nuorat

Mikkelsena mielas lea hui deaŧalaš ahte erenoamážit mánát ja nuorat gulahallet iežaset ahkásaččaiguin sámegillii.

– Vásihusa vuođul diehtit mii ahte suomagiella dahje dárogiella leat váldogielat ollu sámi mánáid gaskkas. Dát fenomena lea seamma Norgga ja Suoma bealde Deanuleagis. Rájá rastá lea baicce sámegiella dávjá áidna dábálaš giella, danne lea geavaheapmi lunddolaš, dadjá Mikkelsen preassadieđáhusas.

Guhkes gaskkat

Sámegiela ealáskahttimis Deanuleagis leat hástalussan guhkes gaskkat ja unnán olbmot. Danne dárbbašuvvojit ođđa čovdosat giela oahppamii ja geavaheapmái beroškeahttá guhkes gaskkain, čállá Sámediggi preassadieđáhusas.

– Prošeakta vuođđuduvvo innovatiivvalaš čovdosiidda ovttas árbedieđuiguin ja dat lea biddjojuvvon gasku ovtta guovllu mii eahpelunddolaččat lea juhkkojuvvon riikkarájiiguin. Dát buktá buori, loahpaha Mikkelsen.

- Advertisement -
-Almmuhus-