-Almmuhus-
OĐĐASATSámediggepresideantas čielga diehtu veahkaválddi eastadeami birra

Sámediggepresideantas čielga diehtu veahkaválddi eastadeami birra

-

-

Aitto almmuhuvvon videos, bidjá sámediggepresideanta fuomášumi veahkaválddálašvuhtii man nissonat vásihit miehtá máilmmi, maiddái Sámis.

Odne lea ON veahkaválddi loahpahanbeaivi nissonolbmuid vuostá.

Dan oktavuođas lea Sámediggi almmuhan video mas presideanta dáhttu duohta riektesuoji nissoniidda geat vásihit veahkaválddálašvuođa.

 

Seamma stuorra áitta go HIV/Aids ja borasdávda

Máilmmibáŋkku árvvoštallama mielde lea veahkaválddálašvuohta nissonolbmuid vuostá máilmmiviidosaš dearvvašvuođaáitta, seamma dásis go HIV/aids ja borasdávda. Danne lohká Keskitalo videos ahte lea dehálaš bidjat fuomášumi dása.

– Veahkaválddi váikkuhusat hehttejit nissonolbmuid ollislaš searvama servodahkii. Dat váikkuha servodahkii ja caggá njuolgut rikka ekonomalaš, politihkalaš, servodatlaš ja demokráhtalaš ovdáneami, čilge son videos.

 

– Guoská go midjiide Sámis?

Keskitalo lohká videos ahte dát váttisvuohta guoská maiddái midjiide Sámis.

– Nu guhká go veahkaváldi sámi nissonolbmuid vuostá geavvá, de dat rihkku ovttaskas olbmo vuoigatvuođaid ja vejolašvuođaid ovdánit. Nu guhká go lea veahkaváldi dievdduid dahje nissoniid vuostá, de goazaha dat sámi servodaga ovdáneami ja eallinvuogi. Dan mii gal eat eisege sáhte dohkkehit, lohká son.

 

Čuovvola ášši ráđđehusain

Keskitalo muitala videos maiddái ahte Sámediggi lea ollu jagiid bidjan fuomášumi dán fáddái.

Sii leat searvan Norgga gažadeapmái ON Nissonkomiteas dál skábmamánus.

– Doppe bivde Norgga muitalit maid áigot dahkat bissehan dihtii veahkaválddi sámi nissonolbmuid vuostá, muitala son.

Ráđđehus buvttii njálmmálaš lohpádusaid ahte áigot eanet dutkat fáttá ja dárbbu geahčadan dihte makkár doaibmabijuid berrešii álggahit.

– Sámediggepresideantan lohpidan mun, čuovvolit dán ášši ráđđehusain, dáhkida presideanta videos.

 

Ballá seksuála vealaheami dáhpáhuvvat maiddái sámepolitihkas

Dasto namuha son #metoo kampánnja, mas nissonat iešguđet surggiin leat muitalan seksuála vealaheami birra.

Maiddái ruoŧabeale sámepolitihkas leat muhtimat dieđihan ahte leat vásihan seksuála loavkašuhttima.

– Mis ii leat makkárge sivva jáhkkit ahte dat ii geava maiddái norggabealde, sámepolitihkas dahje sámi bargosajiin, lohká son.

 

– Mii fertet hupmat dán birra

Dasto lea sámediggepresideantas čielga diehtu sidjiide geat dan leat vásihan:

– Huma muhtin olbmuin geasa dus lea luohttámuš ja váldde dan ovdán relevánta orgánain. Dehálaš lea bissehit dákkár láhttenvuogi.

Son lohká ahte mii fertet duostat cuvket tabuid veahkaválddi birra ja hupmat čielgasit dan birra.

– Mii fertet hupmat dan birra iežamet bearrašis ja oahppásiid gaskkas. Mii fertet hupmat mánáiguin sohkabealrollaid, vealaheami, seksualitehta ja rájáid birra. Mii fertet duostat dahkat maid nu veahkaválddálaš láhttenvugiin sámi servodagas, ja muitalit ahte dát ii leat eisege dohkálaš. Veahkaváldi lea rihkkun ja galgá čovdojuvvot politiijaid ja riekteapparáhta bokte. Dat ii galgga čovdojuvvot siskkáldasat sámi servodagas.

 

Dasto son namuha maiddái ahte dutkan čájeha sámiin leat heajos luohttámuša almmolaš ásahusaide, dan lohká son sin fertet leat mielde njulgemin.

Olles video oainnát dás vuollelis.

-Almmuhus-