Sámediggepresideanta Silje Karine Muotka boahtá odne eahkedis Osloi deaivvadit akšunisttaiguin Oljo- ja Energiijadepartemeanttas.
Dan duođašta Muotka Ávvirii.
Odne searvá son vuos digitálalaččat doarjjačalmmustemiide. Son galgá doallat sártni.
Eahkedis vuolgá presideantta girdi Álttás ja dalán go maŋŋit eahkedis seaivu Gardermoenii, son vuolgá Oljo- ja Energiijadepartementii.
– Háliidan dušše deaivvadit nuoraiguin ja háleštit singuin. Lean maid čalmmusteamis searvame dearvvuođaiguin. Šaddá buorre singuin eahkedis deaivvadit.
Dál leat NSR Nuorat ja Luondu ja Nuorat leamaš departemeantta váldo sisaváldimis golbma jándora. Sámediggepresideanta ii loga alddis leamaš oktavuohta ráđđehusain dán áššis.
– Mus ii leat leamaš oktavuohta ráđđehusain eambbo go dat mii lea dábálaš. Ledjen ráhkkanan váldit ráđđehusain oktavuođa jus akšunisttain ii leat biepmu, muhto go dat čoavdašuvai, de árvvoštallen ahte nuorat leat oadjebasat ja dasto ii leamaš dárbu váldit oktavuođa go juo galggan deaivvadit Oljo- ja energiijaministtarin duorastaga, lohká Muotka.
Odne leat stuora čalmmusteamit Oslos diibmu 12 rájes olggobeale Oljo- ja Energiijadepartemeantta. Sihke sámediggepresideanta Silje Karine Muotka, ovddeš presideanta Aili Keskitalo, Mari Boine ja Sara Marielle Gaup Beaska servet čalmmusteapmái.
Maiddái sii geat leat siste servet digitálalaččat.
