Muhtin trailervuoddji šattai guokte vahko čohkkát háldogiddagasas, maŋŋil go gávdnui narkotihka su biillas. Čájehuvvui ahte páhkas ledje roavvasáltti, dál heaittihuvvo ášši.
Čakčamánus dat mekanihkkárat Álttás gávdne imašlaš páhka muhtin traileris mii lei buktojuvvon divuhuvvot divohahkii, čállá Altaposten.
Biddjui háldogiddagassii
Maŋŋil go páhkka rahppui galgá vuoddji, guhte ieš lei buktán trailera divohahkii, dáhtton sin váldit oktavuođa politiijaiguin.
Go politiijat bohte báikái de válde vuoddji gitta ja áššáiduhtte su narkotihka vurkema ovddas.
Maŋŋil son biddjui háldogiddagassii dan botta go politiijat dutkagohte dan man navde leat narkotihkkaduogušteapmin.
Badjel mánnu golai ovdal muitaledje albmái
Guokte Kripos-analysa čájehedje ahte ii lean narkotihka, muhto roavvasálttit, páhkas.
Dán dieđu ii ožžon vuoddji ovdal go dán vahkos, vaikke dát čielggai jo skábmamánu 21. beaivvi, albmá advokáhta Lene Sandberg, dieđuid mielde.
– Áššis lea leamaš badjelmeare guhkes meannudanáigi. Raporta lea stempelaston leansmánnekantuvrii juovlamánu 28. beaivvi, badjel mánu maŋŋil go čielggai ahte páhkas ledje sálttit. Arrestašuvdna, čohkkán, mediafuomášupmi, dutkan ja áigegeavaheapmi lea leamaš noađđin mu klientii, lohká Sandberg Altapostenii.
Politiijaadvokáhtta Ronny Jørgensen, Álttás, duođašta ahte dáhtonat maidda Sandberg čujuha, dollet deaivása.
Son čilge earret eará ahte páhkka lei páhkkejuvvon ja čihkkon dainna lágiin ahte orui eahpidahtti, ja ahte politiijaid narkotihkabeana maid merkii dán.
(©NTB)
