-Almmuhus-
-Almmuhus-
-Almmuhus-
OĐĐASATSalmonella njommon Finnmárkkus ja miehtá Norgga

Salmonella njommon Finnmárkkus ja miehtá Norgga

-

-

Guorahallamat leat biddjon johtui maŋŋel go gávdnui salmonella mii lea njommon 13 olbmui geat ásset iešguđet fylkkas.

Álbmotdearvvašvuođainstituhtta dieđiha ahte sii leat dutkame manne lea čoavje-čoallebakteriija Salmonella Enteritidis njommon nu máŋgasii dál maŋemusat. Guorahallamat čađahuvvojit ovttas suohkandoaktáriiguin, veterinearainstituhtain ja Biebmobearráigeahčuin. Kártenbarggus jearahallet pasieanttaid ja váldet iskosiid biepmuin ja biebmobázahusain, ja galgá čielggaduvvot lea go okta dahje máŋga njoammugáldu.

 

Seamma DNA bakteriijas

Pasieanttat geat leat ožžon duođaštuvvot Salmonella njoammuma, leat guhtta dievddu ja čieža nissona geat leat 10 jagis gitta 73 jagi boarrásat. Sii ásset Oslos, Vestfoldas, Rogalánddas, Opplánddas, Vest-Agderis, Trøndelágas, Nordlánddas, Romssas ja Finnmárkkus. Álbmotdearvvašvuohta duođašta ahte lea seamma DNA-profiila bakteriijas maid leat gávdnan sis.

Dat Salmonella Enteritidis bakteriija lea earálágán go ovddeš gávdnosat Norggas. Dat lea maid earálágán go ovddit háve go gávdne bakteriija moniin mat bohte Polenis 2016:s ja 2017:s.

 

Áddjái ja moalkái

– Dutkanbargu sáhttá leat moalkái ja áddjás bargu. Ollu áššiin eai nagot gávdnat gos njoammun lea boahtán, ja lea go sáhka seamma njoammugáldus. Lea vuos beare árrat maid dadjat boahtá go njoammun bisánit dál, vai leavvá go ain viidáset ja lassána go, muhto mii čuovvut dan dili dárkilit, lohká Álbmotdearvvašvuođainstituhta seniorráđđeaddi Solveig Jore.

Nu go dábálaččat, de ávžžuhuvvojit olbmot bures bassat gieđaid go leat hivssegis finadan, ovdal go gohkkejit ja boradit, vai ii šatta infekšuvdna mii sáhttá dagahit luhčadávddaid.

(©NTB)

 

-Almmuhus-