-Almmuhus-
OĐĐASATSalaby šaddá menddo divrrasin buvttadit sámegillii

Salaby šaddá menddo divrrasin buvttadit sámegillii

-

-

Sámediggi ii sáhte ollašuhttit Čálliidlágádusa niegu buvttadit Salaby digitála oahpponeavvu sámegillii. Lágádushoavda ballá Salabya šaddat Gyldendala stuorámus dáruiduhttin gaskaoapmin.

Go Salaby digitála oahpponeavvu ráhkaduvvui, de osttii Čálliidlágádus rivttiid ráhkadit oahppouniversa sámegillii.

 – Salaby almmuhuvvui sullii guđa jagi áigi. Min stuora niehku lea ain ráhkadit Salabya sámi mánáide. Lea imaš go eiseválddit eai vuorut dán. Mii livččiimet gergosat álgit buvttademiin dalán go Sámediggi vuoruha dan, lohká lágádushoavda John Trygve Solbakk.

 

Čálliidlágádusa hoavda John Trygve Solbakk. Vuorkágovva: Astrid Helander

 

Viiddis oahppobáiki

Salaby lea digitála oahpponeavvu man sáhttá geavahit oahpahusa lassin Norgga skuvllain.

Neahttabáikkis leat heivehan buot skuvlafágaide iešguđetlágan bargobihtáid ja lohkamušaid oahppoplánaid vuođul.

Salaby lea heivehuvvon ovdaskuvlamánáide ja mánáidskuvlaohppiide.

 

Dáruiduhttin gaskaoapmi

Vaikke Čálliidlágádus lea guhká vuordán ruhtadeami, de eai leat vuollánan.

Sii ohcet fas ruđaid buvttadeapmái dán dálvvi.

– Salaby livččii maiddái giellaoahppa mii guoskkaha buot eará fágaid, dát beasttášii sámegiela. Jus Salaby ii buvttaduvvo sámegillii, de šaddá dát Gyldendal lágádusa stuorámus dáruiduhttin gaskaoapmin. Sámi mánát vudjot oahppouniversii mii oahpaha sidjiide dušše dárogillii, lohká Solbakk.

 

Menddo divrras

Sámedikki dieđuid mielde máksá sullii 8,1 milljovnna ruvnnu heivehit dušše 1. ja 2. luohkálaččaide Salaby neahttabáikki sámegillii.

Rehketbihttá šaddá dan mađe stuoris ahte Sámedikkis ii juolo ruhta buvttadeapmái. 

 – Sámedikkis lea 22 milljovnna oahpponeavvobuvttadeapmái jahkásaččat, ja min áigumuš lea gokčat ráiggiid oahpponeavvobuvttadeamis sihke nuoraid- ja joatkkaskuvladásis, lohká sámediggeráđđi Silje Karine Muotka.

 

Sámediggeráđđi Silje Karine Muotka. Preassagovva

 

Gulahallet eiseválddiiguin

Salaby oahppouniversa lea ráhkaduvvon dárogillii ja ođđadárogillii.

Dasa lassin lea dat buvttaduvvon máŋga minoritehtagillii, muhto sámegillii ii leat jorgaluvvon.

Sámedikkis lea oktavuohta guovddášeiseválddiiguin go lea dárbu lassi ruhtajuolludemiide sámi oahpponeavvuide.

 – Mun lean váldán oktavuođa ministtarin ja namuhin dán maiddái Stuoradikkelávdegoddái mannán vahkkus. Sii galggašedje vuoruhit ráhkadit Salaby maiddái sámegillii, lohká Muotka.

 

Haddefálaldagat

Salaby lea nu stuora oahpponeavvobuvttadeapmi ahte láhka geatnegahtášii Sámedikki viežžat haddefálaldagaid lágádusain jus galggašedje dan ruhtadit. 

 – Dás fertešii čuovvut almmolaš lága. Jus Sámediggi galggašii dán ruhtadit, de leimmet šaddat viežžat haddefálaldagaid lágádusain. Mun jáhkkán ahte šattašii gilvu, lohká sámediggeráđđi Silje Karine Muotka.

-Almmuhus-