Sámiid Álbmotlihttus lea riikkačoahkkin Tromssas dán vahkkoloahpa, ja deháleamos áššin lea ásahit ođđa lávddi iežaset politihkalaš áŋgiruššamii.
Sámiid Álbmotlihttus lea riikkačoahkkin Tromssas dán vahkkoloahpa, ja deháleamos áššin lea ásahit ođđa lávddi iežaset politihkalaš áŋgiruššamii.
Sámiid Álbmotlihttu (SÁL) meannudii guovtti jagi dassái ahte áigot maiddái šaddat sámepolitihkalaš searvin lassin dan kultuvrralaš beallái mii lea leamaš SÁL dovdomearkan.
Máŋga báikkálašsearvvi leat leamaš vuođđun sámi kultuvrralaš doaimmaide miehtá riikka.
Maŋŋil go moadde jagi leat leamaš garra biekkat, gos politihkalaš oassi leamaš jávkosis, de leat dál ođđasit áŋgiruššamin boahtte sámedikkeválggaide.
Garra biekkat dagahedje maid ahte máŋga báikkálaš searvvi guđđe SÁL, muhto dan maŋŋil lea searvi garrasit rahčan doaibmagoahtit fas.
Miellahtut eai leat šat seamma olu go dalle go SÁL lei stuorámus sámi riikkaviidosaš váldoorganisašuvdna.
Viidásit fievrredit
– Dábálaš riikkačoahkkináššiid lassin, áigut mearridit mo politihkalaččat áigut áŋgiruššat sámedikkeválggaide, muitala jođiheaddji Liv Slettli ja lohká dološ SÁL-vuoiŋŋa viidásit fievrreduvvot ođasmahtton hámis.
– Riikkačoahkkimii bohtet birrasii 50 olbmo, dáidda gullet sáttaolbmot, riikkastivra, lávdegottit ja guossit. Šiehtadallamiid vuođul mearridat ođasmahtton mihtuid ja vitála doaibmaplána SÁL:i. Dasa lassin buktá SÁL maiddái riikkačoahkkinresolušuvnnaid, čilge son.
SÁL lea searvi mii galgá áimmahuššat mearrasámiid ja eatnašiid giliin, ja sii oidnet dárbbu čielga linnjáide.
Dat dáidá šaddat dehálažžan jus galget nagodit beassat sámediggái, mii lea sin stuorra mihttu ja hástalus.
Čállán: Yngve Paulsen
