– Lea leamaš buorre boazodoallojahki, muhto eai boazodoallit eai ge eiseválddit dárbbaš fuolastuvvat Finnmárkku njuovahatkapasitehta geažil. Mii illudat vuostáiváldit buorre kvalitehta biergguid ja mii sáhttit vahkkosaččat njuovvat lagabui 9 000 bohcco Vuotnabađa, Kárášjoga ja Guovdageainnu njuovahagain, dadjá Finnmark Rein Are Figved.
– Lea leamaš buorre boazodoallojahki, muhto eai boazodoallit eai ge eiseválddit dárbbaš fuolastuvvat Finnmárkku njuovahatkapasitehta geažil. Mii illudat vuostáiváldit buorre kvalitehta biergguid ja mii sáhttit vahkkosaččat njuovvat lagabui 9 000 bohcco Vuotnabađa, Kárášjoga ja Guovdageainnu njuovahagain, dadjá Finnmark Rein Are Figved.
Johan M. Buljo guhte jođiha ja koordinere Finnmark Rein njuovahagaid njuovvamiid, dadjá leat dehálažžan ahte boazodoallit árrat váldet oktavuođa Finnmark Reinain šiehttan dihtii njuovvanbeivviid.
– Mii háliidat ahte boazodoallit váldet minguin oktavuođa unnimusat guokte vahkku ovdal go gárddástallagohtet. Ja fertejit mis diŋgot biilla ja dieđihit gávpebohccologu guokte beaivvi ovdal go galgat viežžat daid, dadjá Buljo.
90 000 ovdal juovllaid
– Mii vuhtiiváldit ahte mii buohkat bargat lunddolaš hástalusaiguin ja dálkki mielde, muhto koordineren lea áibbas dehálaš vai buohkat duhtet ja vai ii oktage šatta vuordit. Danne sávvat ahte boazodoallit árrat dieđihit vai eai čoggo beare olu gávpebohccot ja maiddái vai njuovvit eai gártta barggu haga ge gaskkohagaid. Liikká eat vuordde váttisvuođaid čuožžilit. Mii njuovvat 12 vahkku ovdal juovllaid. Jus čađat leat maksimumdásis de mii sáhttit njuovvat 90 000 bohcco ovdal juovllaid ja seamma olu maŋŋil juovllaid, dadjá beaivválaš jođiheaddji Are Figved.
Finnmark Rein lea davviriikkaid stuorámus njuovahat. Fitnodat jođiha bierggu borramušgávppiide earret eará «Finnmark Rein», «Viddas», «Coop», «Varanger» ja «Folkets» mearkanamaid bokte. Fitnodaga váldokantuvra lea Deanus Finnmárkkus.
