-Almmuhus-
-Almmuhus-
-Almmuhus-
OĐĐASAT– Sáhttit juobe logi heakka ge gádjut

– Sáhttit juobe logi heakka ge gádjut

-

-

Guovdageainnu Sosialisttalaš Gurutbellodat lea áidna bellodat, dain mat serve álbmotčoahkkimii vahkku áigi, mii lea mielas váldit vuostá báhtareddjiid.

SGB sátnejođiheaddjeevttohas, Marit Susanne Utsi, lei áidna sátnejođiheaddjeevttohas álbmotčoahkkimis Guovdageainnus gii dajai «Juo» gažaldahkii galgá go Guovdageainnu suohkan váldit vuostá báhtareddjiid.

Muđui dadjet eará bellodagat ahte «berrešeimmet váldit vuostá, muhto ii galgga suohkan dán vuoru váldit vuostá báhtareddjiid», dahje juo ii oba galgga ge váldit vuostá.

– Mis lea maid ovddasvástádus váldit sin vuostá geat leat heahtedilis. Eai sii leat suohttasa dihte deike boahtime, sii leat dadjat heaggaheađis. Jus juohke suohkan válddášii juobe logi báhtareaddji ge, de gárttaše olu báhtareaddjit geat besset deike. Muitit ahte mii leat de gádjon logi heakka, lohká Utsi.

 

Visttit

Utsi lohká ahte sii fertejit vuos mearridit váldit vuostá báhtareddjiid, ja dasto hutkagoahtit gos galget orrut, muhto hoahpus gal lohká juo suohkanis visttiid gos sáhtášedje orrut.

– Mázes lea ássan- ja bálvalusguovddáš mii lea guoros dál. Mázes lea maid servodatviessu, ja Láhpoluobbalis vel skuvla mii lea guoros. Heađis gal leat mis visttit dál juo, dadjá son.

 

Bargosajit

Utsi maid lohká suohkanii livčče bargosajit go báhtareaddjit bohtet, ja maid jáhkká sii leat resursan ovdalii go giksin.

– Mis han leat olu barggut maidda eai gávdno olbmot. Jáhkán jus mii geahččat báhtareddjiid maid resursan, eat ge giksin, go mun jáhkán jus mii heivehit sin johtilit servodahkii, giela oahpahit sidjiide, dalle han sáhtáše sii leat maid bargoveahkaresursan eai ge giksin, lohká son.

 

Eai muitte soahteáiggi

Utsi maid cuiggoda eará bellodagaid go leat nu vuostá báhtareddjiid váldimis vuostá.

– Eai oro muitiime ahte mii leat maid ferten báhtarit go dáppe lei soahti. Jus dalle ii livčče okta ge fuollan min iežaset riikii báhtareaddjin, na movt de livččii. Ávžžuhan veahá jurdilit buohkaid, lohká son ja lasiha vel:

– Ii galgga oktage geassit boarrásiid dán digaštallamii, go dat lea eará ášši. Mii galgat sáhttit skuvllaid doalahit ja boarrásiid dikšut, vaikke vel váldit ge báhtareddjiid deike. Ii galgga dieid bidjat vuostálagaid, go ii leat nu movt dahkko, ahte boarrásat šaddet gillát jus báhtareddjiid váldit Guovdageidnui, lohká son vel loahpas.

 

-Almmuhus-