-Almmuhus-
OĐĐASAT«– Sáhttet šaddat veahkaválddálažžan jus njuovvamiid oidnet»

«– Sáhttet šaddat veahkaválddálažžan jus njuovvamiid oidnet»

-

-

Moadde beaivvi áigi fitne Davvi-Trøndelága mánáidgárddi mánát gárdde luhtte gos maid ledje njuovvame bohccuid. Dasa leat dál olbmot reageren, ja leat máŋgačuođi cuiggodeami ožžon Facebook-siiddus, ja okta čuoččuha juo ahte mánát sáhttet šaddat veahkaválddálažžan go rávisolmmožin šaddet go dákkáriid oidnet.

15 máná Granstubben mánáidgárddis besse ovtta olles beaivvi leat mielde go Shæhkere sijte, Davvi-Trønelágas, lei bidjan ealu gárdái, ja maid njuvve gávpebohccuid.

Mánáidgárddi bargit govvejedje olu govaid mánáid vásáhusain doppe, gos sii maid besse leat mielde geassimis duljiid čoahkkái, ja maid oivviid ja julggiid čohkket kontainerii.

Go bidje govaid iežaset Facebook-siidui, de gal ožžo issoras olu reakšuvnnaid.

 

Badjel vihttačuođi kommentára
Olu kommentárain leat olbmot reageren go mánát šaddet oaidnit, nu go muhtumat juo lohket, njuolggut goddimiid.

Muhtumat dadjet sii leat váhnenolbmot, ja sin mánát eai galgga dárbbašit diekkár romes ja unohis diŋggaid oaidnit.

Nuppit fas lohket mánáid mielas leat eallit čábbát ja heajut, maid ii galgga goddit.


Šearbmagovva Granstubben mánáidgárddi Facebook-siiddus

Dá muhtun kommentárat:
«Viggabehtet dahkat dábálažžan goddima.»
«Dábálaš guoddit oivviid ja julggiid mat leat čuhppon luovos? Mainna sii jurddašit?»
«Mun in livčče iežan mánáid diktán diekkár mánáidgárddis leat, gos diekkár oaidnu lea elliide.»
«Dá bijan čujuhusaid gos sáhttá lohkat movt čatnet elliid illasteami bahádaguide, erenoamážit doarrumii ja veahkaválddálašvuhtii.»

(Ášši joatká gova vulobealde)


Granstubben mánáidgárddi jođiheaddji, Dag Olav Stølen.
 Priváhta govva

Vegetariánasiidu boktán olbmuid
Granstubben mánáidgárddi jođiheaddji, Dag Olav Stølan, muitala ahte sii leat olu buriid kommentáraid maid ožžon, ja dat heajos reakšuvnnat eai boahtán ovdal go govaid lea muhtun juohkán dakkár vegetariánasiiddus. (Vegetariána lea dakkár mii ii bora bierggu ii ge guliid (doaim.meark.).

Stølan muitala ahte leat nu issoras olu kommentárat boahtán, ahte sus ii leat oba dilli ge leamaš lohkat visot daid.

– Mun lean oaidnán go leat čálašan, muhto in leat astan váldit áiggi dasa vuos, muitala Stølen, ja lohká diehtit ahte leat garra reakšuvnnat mánaidgárddi Facebook-siiddus.

 

Heammástuvvan
Shækere sijte orohatovdaolmmoš, Hanne Lena Wilks, lea heammástuvvan go nu garra reakšuvnnat leat boahtán go mánát leat leamaš sin gárdde luhtte ja oaidnán movt bohccuid njuvvet.

– Gal dat lea ártet go olbmot lea gáidan nu guhkás eret das mii lunddolaš lea, lohká son.

(Ášši joatká gova vulobealde)


Shæhkere sijte orohatovdaolmmoš, Hanne-Lena Wilks.
Govven: Aina By

 

Loahpaid gárdde čađa bidjame
Wilks muitala ahte unnán muohttaga geažil ii leat nu álki leamaš čoahkis doallat ealu, ja dát bihttá mii lei gárddis, leat bohccot mat eai leat leamaš čoahkis čakčat.

– Mu mielas orro mánát návddašeame hui bures go ledje gárdde luhtte, muitala son.

– Mun ledjen ieš hui unni go ledjen mielde bohcco njuovvame, ja lea ártet jus buohtastahttet ahte sáhttá šaddat veahkaválddálažžan go oaidná go bohccuid njuvvet, šuohkiha son.

 

Ávžžuha eambbo mánáidgárddiid
Norgga Boazosápmelaččaid Riikkasearvvi ovdaolmmoš, Ellinor Marita Jåma, lea maid oaidnán govaid ja ahte leat reakšuvnnat boahtán mánáidgárddi siidui. Son gal baicca giitala iežas Facebook-siiddus Granstubben mánáidgárddi bargiid go leat mánáid váldán mielde gárdde lusa.

Son čállá maid ahte ávžžuha eambbo mánáidgárddiid váldit mielde mánáid gárdde lusa gos njuvvet bohccuid.

 

Ávvudit Sámi álbmotbeaivvi
Granestubben mánáidgárddi jođiheaddji muitala ahte sii lávejit mánáidgárddis juohke jagi ávvudit Sámi álbmotbeaivvi.

Nu áigot dán jagi maid, erenoamažit go lea vuosttaš sámekonferánssa 100-jagi ávvudeapmi.

– Midjiide lea sámevuohta lunddolaš, ja lea maid mánáidgárddi rámmaplánas ahte galgat oahpahit sápmelaččaid birra. Danin mii leimmet maid gárdde luhtte, ja maid ávvudit dán ge jagi Sámi álbmotbeaivvi, muitala Dag Olav Støland.


Da lea Ávvir váldan šearbmagova muhtun kommentárain mat leat Granstubben mánáidgárddi ruovttusiiddus.

 

-Almmuhus-