-Almmuhus-
-Almmuhus-
-Almmuhus-
OĐĐASATSáhttet massit 38 miljovdnasaš feargadoarjaga

Sáhttet massit 38 miljovdnasaš feargadoarjaga

-

-

Finnmárkku fylkkasuohkan sáhttá massit 38 miljovnna ruvdnosaš doarjaga jus feargadoarjja heaittihuvvo. Dat lea logi proseantta olles fylkkasuohkana kollektiivajohtolat bušeahtas.

– Dát leat stuora váikkuhusat min busse- ja fanasfálaldahkii, lohká Geir Ove Bakken, guhte lea Finnmárkku fylkkasuohkana kultuvrra ja johtalus váldolávdegotti jođiheaddji. Dan dieđiha Finnmárkku fylkkagielda preassadieđáhusas.

 

Lohpidii vástádusa

Stádačálli Kristin H. Jensen lohpidii čakčamánu 7. beaivvi čoahkkimis politihkalaš jođihemiin ahte galgá johtilit boahtit vástádus Finnmárkku fylkkasuohkanii boahtteáiggi doarjaga birra.

Dás lea hupmu boahtte jagi doarjaga birra, guovtti  fearga johtolagas. Dalle lohpidii stádačálli buktit hui jođánit čálalaš vástádusa, oažžu go Finnmárkku fylkkasuohkan doarjaga fergii Ákšuvuona ja Doaresvuona gaskka, ja Mikkelsby ja Kongshus gaskka.

 

Eai ožžon vástádusa

 – Čakčamánu 13. beaivvi mun riŋgejin stádačállái jearran dihte vástádusa birra mii lohpiduvvui čoahkkimis. De ožžon dieđu ahte ferten boahtte vahkus riŋget ja ahte ášši lea oassi stádabušeahta šiehtadallamiin. Mii geat leimmet čoahkkimis leat buohkat ovttaoaivilis ahte stádačálli logai ahte áigu jođáneamos lági mielde addit čálalaš dieđu boahtte jagi feargadoarjaga birra, lohká Geir Ove Bakken.

 

(Ášši joatká govv vuolábealde)


Geir Ove Bakken. Govven: Maria Borch Mietinen

 

– Ferte čielggaduvvot

Bakken joatká: – Dat lea hui dehálaš oažžut čielggadeami jođáneamos lági mielde. Evttohus mii stádabušeahtas boahtá sáhttá mearkkašit ahte fylkkasuohkan oažžu 38 miljovnna unnit. Dat lea sullii logi proseantta olles Finnmárkku kollektiivajohtolat bušeahtas. Dakkár unnideamis lea stuora váikkuhusat sihke kollektiivajohtolahkii ja maid eará bálvalusaide fylkkas.

-Almmuhus-