Šuoššjávrri olggobeale lea muhtun duksen sáttoguba ja ruossa vel ceggen dan guba ala. Giláža ássi ii dieđe mii dat lea mii lea «hávdáduvvon» dasa, ii ge loga iežas liikot lihkahallat maidege masa ruossa lea vel ceggejuvvon. DÁS OAINNÁT VIDEO:
Šuoššjávrri olggobeale lea muhtun duksen sáttoguba ja ruossa vel ceggen dan guba ala. Giláža ássi ii dieđe mii dat lea mii lea «hávdáduvvon» dasa, ii ge loga iežas liikot lihkahallat maidege masa ruossa lea vel ceggejuvvon. DÁS OAINNÁT VIDEO:
Muhtun bisánansadjái Šuoššjávrris, golbma kilomehtera nuorttas Kárášjoga guvlui, Áitejohgáttis, lea duksejuvvon sáttoguhpa ja ruossa vel ceggejuvvon guba ala. Šuoššjávrri ássi reagere go dakkár mii sulastahtte hávddi lea ihtán su lagasbirrasii.
Unohas
Alf Kristian Eriksen orru Šuoššjávrris, sus lea bearaš doppe ja son lea sávzaboanda. Son muitala iežas dan sáttoguba mannan bievllas juo oaidnán, ja dál son oaidná ahte dat sadji lea ain seamma ládje.
– Oainnán dat ii leat lihkahallon, ja mu mielas gal lea unohas go dákkár lea ilbman min lagasbirrasii. Politiijat leat galgan fitnat geahččame báikki, muhto in leat gal gullan šat maidege diimmá rájes, in dieđe leat go leamaš geahččame ge dan, muitala son.
Ášši joatká gova vuolábealde:
Govven: Nils Johan Vars
Eai dieđe maidege
Stáhta geaidnodoaimmahaga Davvi-Norgga doaibma- ja divodanovttadaga hoavda, Tor Inge Hellander, ii loga diehtit dien birra maidege. Son lohká sihkkarin ahte sin bealis ii leat ráhkaduvvon makkárge muitomearka dahje juoga dakkár.
– Mun in nagot oaidnit ge govain maid mii leat govven luottas diekko bokte, ahte dien bisánansajis lea sáttoguhpa ja ruossa vel das alde. Dat govat leat govvejuvvon borgemánu 28. beaivvi diibmá, ja dalle goit ii leat leamaš mihkke dien bisánansajis, muitala son.
Soitet fertet politiijat
Hellander lohká ahte son ii dieđe maid sii galget dál dahkat dainna, eambbo son ferte oažžut muhtuma fitnat báikkis ja oaidnit dan sáttoguba.
– In jáhke mii nagodit juste dál oažžut olbmuid dohko go lea fargga vahkkoloahppa ja vel moadde bassebeaivvi, nu ahte in sáhte dadjat goas mii astat fitnat geahččame dan báikki, lohká son.
– Boahtibehtet go rádjat eret dan «hávddi»?
– Na, mun gal lean eahpesihkar gii dan galgá dahkat. Soitet fertet politiijat iskat dan guba, lohká son vel loahpas, ja lohpida iskat ášši dárkileappot.
Kárášjoga leansmánnekantuvrras ii lean oktage barggus ikte, ja Ávvir ii ožžon de kommentára sis.
Dán ášši sáhttá maid lohkat odná báberáviissas.
