Dát dilli mii dál lea Norggas koronavirusa ektui, čájeha ahte ráđđehusas ii leat rievttálaš vuođđu mearridit eastadandoaimmaid doarvái jođánit.
Stádaministtar, justiisaministtar ja dearvvašvuođaministtar dolle odne preassakonferánssa koronavirusa gieđahallama birra, gos dieđihit ođđa doaimmaid birra gieđahallan koronadávdda leavvama riikkas.
Dárbu jođánit bargat
Norgga stádaministtar Erna Solberg lohká dán dilis bággu bargat jođánit, ja oaidná dárbbu vel eambbo doaimmaide eastadit dávdda leavvamis.
– Oaidnit ahte lea dárbu vel eambbo doaimmaid bidjat johtui. Stuoradiggi bargá jođánit, muhto gáibida áiggi mearridit lágaid dahje spiehkastit lágain. Mii leat dál erenoamáš dilis, ja lea dárbu jođánit bargat. Danne sáddet dál proposišuvnna Stuoradiggái mii addá ráđđehussii vejolašvuođa jođánit mearridit lágaid, maiddái daid mat spiehkastit min dálá lágain, lohká stádaministtar.
Dát dahká ráđđehussii álkibun váldit dárbbašlaš mearrádusaid jođáneappo. Solberg lohká maid ahte Stuoradikkis galgá leat vejolašvuohta ollásit dahje osiid váldit eret láhkkanjuolggadusain maid ráđđehus dál mearrida, jus maŋŋil eai leat ovttaoaivilis daidda.
